ભારતીય સિનેમામાં આદિત્ય ધરના નિર્દેશનમાં બનેલી 'ધુરંધર 2' અત્યારે બોક્સ ઓફિસ પર ધૂમ મચાવી રહી છે. જોકે, ફિલ્મની આ ભવ્ય સફળતાની સાથે જ એક મોટો વિવાદ પણ જોડાયો છે. કોઈપણ કલાત્મક કૃતિ જ્યારે ધાર્મિક આસ્થાઓ સાથે ટકરાય છે, ત્યારે પ્રખ્યાતિની સાથે વિવાદોનું વંટોળ પણ ઉભું થતું હોય છે. આ ફિલ્મમાં રજૂ કરાયેલા એક દ્રશ્યને કારણે સર્જાયેલા વિવાદે અત્યારે સોશિયલ મીડિયા અને સિનેમા જગતમાં ભારે ચર્ચા જગાવી છે.

રણવીર સિંહ સ્ટારર ફિલ્મ 'Dhurandhar 2: The Revenge' હાલમાં બોક્સ ઓફિસ પર શાનદાર દેખાવ કરી રહી છે, પરંતુ તેની સાથે જ ફિલ્મ એક ગંભીર ધાર્મિક વિવાદમાં ફસાઈ છે. ફિલ્મમાં અભિનેતા આર. માધવનના એક સીન પર શીખ સમુદાયની લાગણી દુભાવવાનો આરોપ લાગતા માધવને પોતે સોશિયલ મીડિયા પર વીડિયો શેર કરી માફી માંગવી પડી છે.

શું હતો વિવાદનો મુદ્દો?

વિવાદનું મુખ્ય કારણ ફિલ્મનો એક સીન છે જેમાં આર. માધવનનું પાત્ર ગુરુ ગોવિંદ સિંહ જીના પવિત્ર 'દશમ ગ્રંથ'ની પંક્તિઓનું ઉચ્ચારણ કરે છે. સોશિયલ મીડિયા પર એવો આક્ષેપ કરવામાં આવ્યો હતો કે માધવને આ પવિત્ર પંક્તિઓ બોલતી વખતે હાથમાં સિગરેટ પકડી રાખી હતી, જેનાથી શીખ સમુદાયની ધાર્મિક મર્યાદાનું અપમાન થયું છે.

આર. માધવને વીડિયો દ્વારા આપી સફાઈ

મામલો બિચકતા આર. માધવને તાત્કાલિક એક સ્પષ્ટતા કરતો વીડિયો જાહેર કર્યો છે. તેણે જણાવ્યું કે, પવિત્ર પંક્તિઓ બોલતા પહેલા જ તેણે સિગરેટ બુઝાવી દીધી હતી. નિર્દેશક આદિત્ય ધરે ખાસ સૂચના આપી હતી કે પવિત્ર લાઈનો દરમિયાન મોઢામાંથી ધુમાડો નીકળવો જોઈએ નહીં. જો દર્શકો ધ્યાનથી જોશે તો ખ્યાલ આવશે કે જે ક્ષણે મંત્રોચ્ચાર શરૂ થાય છે, તે સમયે હાથમાં સિગરેટ કે આસપાસ ધુમાડો નથી.

'જાણે-અજાણે દિલ દુભાયું હોય તો ક્ષમા'

ભાવુક થઈને માધવને ઉમેર્યું કે તે પોતે શીખ ધર્મનો ઘણો આદર કરે છે અને દરેક ફિલ્મની રજૂઆત પહેલા ગોલ્ડન ટેમ્પલ ખાતે દર્શન કરવા જાય છે. તેણે કહ્યું, "અમારો ઈરાદો કોઈની આસ્થાને ઠેસ પહોંચાડવાનો નહોતો. તેમ છતાં જો કોઈની લાગણી દુભાઈ હોય તો હું દિલથી માફી માંગુ છું."

સ્ટાર પાવર અને બોક્સ ઓફિસ

આ ફિલ્મમાં રણવીર સિંહ ઉપરાંત સંજય દત્ત, અર્જુન રામપાલ અને સારા અર્જુન જેવા દિગ્ગજ કલાકારો છે. ફિલ્મ અત્યારે તેની એક્શન સિક્વન્સને કારણે ચર્ચામાં છે, પરંતુ આ વિવાદની અસર ફિલ્મના કલેક્શન પર કેવી રહેશે તે આવનારો સમય જ બતાવશે.