મધ્ય પૂર્વમાં ચાલી રહેલા ભીષણ યુદ્ધને કારણે વૈશ્વિક તેલ પુરવઠામાં મોટી અડચણો સર્જાઈ છે. આ પરિસ્થિતિ વચ્ચે ભારતના પેટ્રોલિયમ મંત્રાલયે શનિવારે જણાવ્યું કે ભારતીય કંપનીઓએ પોતાની જરૂરિયાત પૂરી કરવા માટે ઈરાનથી ક્રૂડ ઓઇલ ખરીદવાનું શરૂ કરી દીધું છે.

ભારતે મે 2019થી ઈરાનથી તેલ ખરીદવાનું બંધ કરી દીધું હતું
ભારત વિશ્વનો ત્રીજો સૌથી મોટો તેલ વપરાશકર્તા દેશ છે. અમેરિકાના દબાણને કારણે ભારતે મે 2019થી ઈરાનથી તેલ ખરીદવાનું બંધ કરી દીધું હતું, પરંતુ હાલના યુદ્ધના પરિણામે તેને ફરી શરૂ કરવામાં આવ્યું છે.

પેટ્રોલિયમ મંત્રાલયે સોશિયલ મીડિયા પર જાણકારી આપી કે, ભારતીય કંપનીઓએ ઈરાનથી તેલની વ્યવસ્થા કરી લીધી છે અને તેના પેમેન્ટમાં હવે કોઈ અવરોધ નથી. ગત મહિને અમેરિકાએ તેલની અછતને દૂર કરવા માટે ઈરાની તેલ પર લાગેલા પ્રતિબંધોમાં અસ્થાયી છૂટ આપી હતી, જેથી આ સોદો સરળ બન્યો છે.

મહત્વની વાતો
- ભારત હાલ 40થી વધુ દેશોમાંથી તેલ ખરીદે છે. કંપનીઓને પૂર્ણ સ્વતંત્રતા છે કે, તેઓ પોતાની જરૂર અને લાભ અનુસાર ક્યાંથી પણ તેલ મંગાવી શકે.
- ક્રૂડ ઓઇલ સાથે જ ભારતે ઈરાનથી 44,000 મેટ્રિક ટન LPG પણ ખરીદી છે.
- આ LPG એક એવા જહાજથી આવી છે જેના પર અગાઉ પ્રતિબંધ હતો. આ જહાજ બુધવારે મંગલોર બંદર પહોંચ્યું અને ત્યાંથી ગેસ ઉતારવાનું કામ શરૂ થઈ ગયું છે.