પશ્ચિમ બંગાળના માલદા જિલ્લામાં ન્યાયિક અધિકારીઓ સાથે થયેલી અપમાનજનક વર્તણૂક અને ધમકી આપવાની ઘટના પર સુપ્રીમ કોર્ટે સખ્ત રવૈયો અપનાવ્યો છે. કોર્ટે આને ન્યાય વ્યવસ્થામાં અવરોધ ઊભો કરવાની ગંભીર કોશિશ ગણાવીને રાજ્ય વહીવટીતંત્રની કાર્યપદ્ધતિ પર પણ સવાલ ઉઠાવ્યા છે.

સુપ્રીમ કોર્ટની બેંચ, જેની અધ્યક્ષતા ન્યાયમૂર્તિ સૂર્યકાંત કરી રહ્યા હતા તેણે કહ્યું કે સાત ન્યાયિક અધિકારીઓ (જેમાં ત્રણ મહિલાઓ પણ સામેલ છે)ને કલાકો સુધી વિના સુરક્ષા, ભોજન અને પાણી વગર છોડી દેવામાં આવ્યા હતા, જે અત્યંત ચિંતાજનક છે. કોર્ટે કહ્યું કે પહેલેથી જ માહિતી હોવા છતાં રાજ્ય વહીવટીતંત્ર સમયસર કાર્યવાહી કરી શક્યું નહીં, જે વહીવટીતંત્રની મોટી નિષ્ફળતા દર્શાવે છે.

રાજ્ય અધિકારીઓને નોટિસ
કોર્ટે આ મામલે સખ્ત પગલાં લેતાં રાજ્યના મુખ્ય સચિવ, ગૃહ સચિવ અને પોલીસ મહાનિર્દેશક સહિત અનેક વરિષ્ઠ અધિકારીઓને કારણ બતાવો નોટિસ જારી કરી છે.

કોર્ટે પૂછ્યું છે કે સમયસર યોગ્ય સુરક્ષા વ્યવસ્થા કેમ કરવામાં આવી નહીં અને ન્યાયિક અધિકારીઓને આ સ્થિતિમાં કેમ છોડી દેવામાં આવ્યા? કોર્ટે સ્પષ્ટ કહ્યું કે આ ઘટના કાનૂનના શાસન પર સીધો હુમલો છે અને તેને કોઈ પણ સ્થિતિમાં સહન કરવામાં આવશે નહીં.

સુપ્રીમ કોર્ટે ચૂંટણી પંચને આદેશ આપ્યો છે કે તે ન્યાયિક અધિકારીઓની સુરક્ષા માટે પર્યાપ્ત કેન્દ્રીય દળોની તૈનાતી સુનિશ્ચિત કરે. સાથે જ કોર્ટે કહ્યું કે SIR પ્રક્રિયા દરમિયાન કોઈ પણ પ્રકારની અવરોધ ન આવવો જોઈએ અને અધિકારીઓને નિર્ભયપણે પોતાનું કામ કરવા દેવામાં આવે.

આગામી સુનવણી ક્યારે?  
કોર્ટે એ પણ કહ્યું કે ન્યાયિક અધિકારીઓ અને તેમના પરિવારોને કોઈ પ્રકારનો ખતરો છે કે નહીં, તેનું તાત્કાલિક મૂલ્યાંકન કરવામાં આવે અને જરૂરી સુરક્ષા પૂરી પાડવામાં આવે. તેમજ તમામ સંબંધિત અધિકારીઓને આગામી સુનવણીમાં વર્ચ્યુઅલ રીતે હાજર રહીને પૂર્ણ રિપોર્ટ આપવાનો આદેશ આપ્યો છે. 

કોર્ટે સ્પષ્ટ કર્યું કે, તે કોઈપણ સ્થિતિમાં ન્યાયિક અધિકારીઓની સુરક્ષા અને કાનૂન વ્યવસ્થા જાળવી રાખવા માટે કડક પગલાં લેશે.