સાણંદની 19 વર્ષીય યુવતી, જે દુષ્કર્મનો ભોગ બની હતી, તેણે પોતાની 21 અઠવાડિયાની ગર્ભાવસ્થાને સમાપ્ત કરવા માટે ગુજરાત હાઇકોર્ટના દ્વાર ખટખટાવ્યા છે. પીડિતાએ મેડિકલ ટર્મિનેશન ઓફ પ્રેગ્નન્સી એક્ટ હેઠળ ગર્ભપાતની મંજૂરી માંગી છે, કારણ કે આ ગર્ભપાત માટે કાયદાકીય મર્યાદા અને તબીબી અભિપ્રાય અનિવાર્ય છે. અરજદારના જણાવ્યા અનુસાર, પીડિતા અગાઉ અમદાવાદની સોલા સિવિલ હોસ્પિટલમાં ચાર દિવસ સુધી સારવાર હેઠળ હતી. જ્યારે તેણે ડોક્ટરો સમક્ષ ગર્ભપાતની ઈચ્છા વ્યક્ત કરી, ત્યારે હોસ્પિટલ સત્તાધીશોએ તેને દાખલ કરવાની ના પાડી દીધી અને જણાવ્યું કે ગર્ભપાત માટે સક્ષમ કોર્ટનો સત્તાવાર આદેશ લાવવો જરૂરી છે, જેના કારણે પીડિતાને મુશ્કેલીનો સામનો કરવો પડ્યો હતો.

જ્યારે આ મામલો હાઇકોર્ટ સમક્ષ સુનાવણીમાં આવ્યો, ત્યારે પીડિતાના વકીલે કોર્ટનું ધ્યાન દોર્યું હતું કે પીડિતા હાલમાં હોસ્પિટલમાં જ છે અને તેને અસહ્ય પેટમાં દુખાવો થઈ રહ્યો છે, તેમ છતાં સત્તાધીશો તેને દાખલ કરી રહ્યા નથી. આ રજૂઆત બાદ અદાલતે હોસ્પિટલના વહીવટી તંત્રની કાર્યશૈલી સામે સવાલો ઉઠાવ્યા હતા. ન્યાયાધીશે સોલા સિવિલ હોસ્પિટલના સત્તાધીશોને તાત્કાલિક અસરથી પીડિતાને દાખલ કરવા અને જરૂરી સારવાર પૂરી પાડવાનો આદેશ આપ્યો હતો. કોર્ટે સ્પષ્ટ કર્યું હતું કે જો કોઈ દર્દીને તબીબી સહાયની જરૂર હોય, તો હોસ્પિટલ માત્ર કોર્ટ ઓર્ડરના બહાને તેને સારવાર આપવાથી વંચિત રાખી શકે નહીં. હાઇકોર્ટે આ કેસમાં તબીબી અભિપ્રાય લેવા માટે સોલા સિવિલના ગાયનેકોલોજી વિભાગના વડા અને નિષ્ણાત ડોક્ટરોની એક ખાસ પેનલ રચવાનો નિર્દેશ આપ્યો છે.

આ પેનલ પીડિતાની શારીરિક તપાસ કરશે અને નક્કી કરશે કે આ તબક્કે ગર્ભપાત કરવો પીડિતાના જીવ માટે જોખમી છે કે કેમ.અદાલતે આ મામલાની ગંભીરતા અને સમયની મર્યાદાને ધ્યાનમાં રાખીને હોસ્પિટલ પાસે આગામી  એપ્રિલ સુધીમાં વિગતવાર મેડિકલ રિપોર્ટ માંગ્યો છે. આ રિપોર્ટમાં પીડિતાની વર્તમાન સ્વાસ્થ્ય સ્થિતિ અને ગર્ભપાત કરવા માટેના જોખમી પરિબળો અંગે ડોક્ટરોએ પોતાનો સ્પષ્ટ અભિપ્રાય આપવાનો રહેશે. હવે 13 એપ્રિલના રોજ જ્યારે મેડિકલ રિપોર્ટ કોર્ટ સમક્ષ રજૂ કરવામાં આવશે, આ કેસ ફરી એકવાર દુષ્કર્મ પીડિતાઓના અધિકારો અને મેડિકલ ઇમરજન્સીમાં હોસ્પિટલોની જવાબદારી અંગે ચર્ચા જગાવી રહ્યો છે.