કચ્છનું રણ તેની સુંદરતા માટે જાણીતું છે, પરંતુ વરસાદ દરમિયાન તે જોખમી બની જાય છે. રણમાં રસ્તાઓનું ચોક્કસ નિશાન ન હોવાને કારણે અને કાદવ-કીચડના સામ્રાજ્ય વચ્ચે દિશા ભ્રમિત થવાની ઘટનાઓ બનતી હોય છે. આવા સમયે સ્થાનિક ભૌગોલિક પરિસ્થિતિનું જ્ઞાન અને સમયસૂચકતા જ ફસાયેલા લોકો માટે જીવનદાન સાબિત થાય છે.

કચ્છના નાના રણમાં મુસાફરી કરી રહેલા 8 લોકો માટે એક સમયે મોત સામે દેખાતું હતું, પરંતુ આડેસર પોલીસ અને પલાસવા ગામના લોકોની જાગૃતિએ મોટી હોનારત ટાળી દીધી છે. આ તમામ લોકો બોલેરો ગાડી મારફતે ટિકરથી પલાસવા તરફ જઈ રહ્યા હતા. વરસાદી માહોલ અને રણમાં ભરાયેલા પાણીના કારણે તેઓ રસ્તો ભટકી ગયા હતા અને રણની વચ્ચે ફસાઈ ગયા હતા.

કલાકો સુધી રણમાં ફસાયેલા રહેવાને કારણે આ પ્રવાસીઓ પાસે ખાવા-પીવાની સામગ્રી ખૂટી પડી હતી, જેના લીધે તેમની હાલત કફોડી બની હતી. આખરે મોબાઈલ ફોન દ્વારા પલાસવા ગામના આગેવાનો અને પોલીસનો સંપર્ક સાધીને મદદની ગુહાર લગાવવામાં આવી હતી. ઘટનાની ગંભીરતા સમજીને પૂર્વ કચ્છની આડેસર પોલીસની ટીમ તાત્કાલિક ઘટનાસ્થળે રવાના થઈ હતી.

રેસ્ક્યુ ઓપરેશન દરમિયાન રણના ભારે કાદવમાં પોલીસની ગાડી પણ ફસાઈ ગઈ હતી, છતાં ટીમે હિંમત હારી નહોતી. પલાસવા ગામના અનુભવી લોકો અને પોલીસ સ્ટાફે ભારે જહેમત બાદ તમામ 8 લોકોને સહીસલામત બહાર કાઢ્યા હતા. આ સફળ ઓપરેશન બાદ તમામ પ્રવાસીઓએ પોલીસ અને ગ્રામજનોનો હૃદયપૂર્વક આભાર માન્યો હતો.