આજના સમયમાં ગુનેગારો લોકોની ભલાઈ અને ભોળપણનો ગેરફાયદો ઉઠાવવા માટે અવનવા નુસખા અપનાવતા હોય છે. ખાસ કરીને વડીલોને 'લિફ્ટ' આપવાના બહાને કે મદદ કરવાની લાલચ આપીને વિશ્વાસમાં લેવામાં આવે છે અને ત્યારબાદ તેમને નિર્જન સ્થળે લઈ જઈ લૂંટવામાં આવે છે. અજાણ્યા શખસો પર આંધળો વિશ્વાસ મૂકવો ક્યારેક મોટો આર્થિક અને શારીરિક જોખમ નોતરી શકે છે. અમરેલીના રાજુલામાં બનેલી આ ઘટના સમાજ માટે લાલબત્તી સમાન છે.

અમરેલી જિલ્લાના રાજુલા તાલુકાના માંડલ ગામે એક શરમજનક લૂંટની ઘટના સામે આવી છે. જેમાં 82 વર્ષના એક વડીલને બાઈક પર બેસાડી, તેમને ધમકાવીને સોનાના બટનની લૂંટ ચલાવવામાં આવી હતી. જોકે, અમરેલી લોકલ ક્રાઈમ બ્રાન્ચ (LCB) એ ગણતરીના દિવસોમાં જ ટેકનિકલ સર્વેલન્સની મદદથી આ બંને રીઢા ગુનેગારોને ઝડપી પાડી જેલના સળિયા પાછળ ધકેલી દીધા છે.

શું હતી સમગ્ર ઘટના?માર્ચ, 2026 ના રોજ સાંજે ચાલતા જઈ રહ્યા હતા. આ દરમિયાન બાઈક પર આવેલા બે યુવકોએ તેમને ઘરે મૂકી જવાની લાલચ આપી વિશ્વાસમાં લીધા હતા. વૃદ્ધ બાઈક પર બેસતા જ આરોપીઓ તેમને ઘરને બદલે અન્ય સ્થળે લઈ ગયા હતા અને માર મારવાની ધમકી આપી ખમીસમાં પહેરેલા અંદાજે 2 તોલા સોનાના 3 બટન આંચકીને ફરાર થઈ ગયા હતા.

પોલીસ કાર્યવાહી અને મુદ્દામાલ

ડુંગર પોલીસ સ્ટેશનમાં ફરિયાદ નોંધાયા બાદ LCB એ તપાસનો ધમધમાટ શરૂ કર્યો હતો. બાતમીદારોની મદદથી રાજુલાના તત્વજ્યોતિ વિસ્તારના બે શખસોની ધરપકડ કરવામાં આવી છે:

સુજલ ઉર્ફે હુડી રાજુભાઈ સોલંકી (ઉં.વ. 20)

સોનુ ઉર્ફે ભુરો કિશનભાઈ સોલંકી (ઉં.વ. 25)

પોલીસે આરોપીઓ પાસેથી નીચે મુજબનો મુદ્દામાલ જપ્ત કર્યો છે:

સોનાના 3 બટન (9.380 ગ્રામ): કિંમત આશરે Rs. 1.21 લાખ

ગુનામાં વપરાયેલ બાઈક સહિત કુલ મુદ્દામાલ: Rs. 1.51 લાખ

આરોપીઓનો ગુનાહિત ઇતિહાસ

પકડાયેલા બંને શખસો રીઢા ગુનેગારો છે. સુજલ વિરુદ્ધ અગાઉ રાજુલા અને પીપાવાવ મરીન પોલીસમાં ચોરી અને મારામારીના કેસ નોંધાયેલા છે. જ્યારે સોનુ વિરુદ્ધ લૂંટ અને ધમકીના 3 થી વધુ ગુનાઓ નોંધાયેલા છે. હાલ પોલીસે બંનેની ધરપકડ કરી કાયદેસરની કાર્યવાહી હાથ ધરી છે.