ભારતની સૌથી મોટી એરલાઇન ઈન્ડિગો (InterGlobe Aviation Ltd) હાલમાં તેના ઈતિહાસના સૌથી મહત્વના વળાંક પર છે. સ્થાનિક બજારમાં વર્ચસ્વ જમાવ્યા બાદ હવે કંપનીની નજર આંતરરાષ્ટ્રીય સ્તરે પાંખો ફેલાવવા પર છે. આવા સમયે નેતૃત્વમાં ફેરફાર માત્ર એક વહીવટી પ્રક્રિયા નથી, પરંતુ કંપનીની ભાવિ રણનીતિનો સંકેત છે. એક આંતરરાષ્ટ્રીય અનુભવ ધરાવતા લીડરની પસંદગી દર્શાવે છે કે ઈન્ડિગો હવે ગ્લોબલ એવિએશન માર્કેટમાં મોટા ખેલાડી તરીકે ઉભરી આવવા માટે સજ્જ થઈ રહી છે.

વિલિયમ વોલ્શ ઉર્ફે વિલી સંભાળશે ઈન્ડિગોનું સુકાન

ઈન્ડિગોના બોર્ડ ઓફ ડિરેક્ટર્સે મંગળવારે એક ઐતિહાસિક નિર્ણય લેતા વિલિયમ વોલ્શને કંપનીના નવા CEO તરીકે નિયુક્ત કરવાની મંજૂરી આપી દીધી છે. નાગરિક ઉડ્ડયન મંત્રાલયની સુરક્ષા મંજૂરી મળ્યા બાદ તેઓ સત્તાવાર રીતે પોતાનો કાર્યભાર સંભાળશે.

ક્યારે સંભાળશે પદભાર?

વિલિયમ વોલ્શ હાલમાં ઈન્ટરનેશનલ એર ટ્રાન્સપોર્ટ એસોસિએશન (IATA) ના ડાયરેક્ટર જનરલ તરીકે સેવા આપી રહ્યા છે. તેમની આગામી સફરની વિગતો નીચે મુજબ છે:

IATA માંથી નિવૃત્તિ: તેઓ 31 July 2026 ના રોજ IATA માં પોતાનો કાર્યકાળ પૂર્ણ કરશે.

ઈન્ડિગોમાં જોડાણ: અંદાજે 3 ઓગસ્ટ 2026 સુધીમાં તેઓ ઈન્ડિગોના CEO તરીકે પદભાર સંભાળે તેવી પૂરેપૂરી શક્યતા છે.

કોણ છે વિલિયમ વોલ્શ? 

એવિએશન ક્ષેત્રે વિલી એક આઇકોનિક નામ છે. તેમનો બહોળો અનુભવ ઈન્ડિગો માટે ગેમ-ચેન્જર સાબિત થઈ શકે છે:

2005 - 2011: બ્રિટિશ એરવેઝના CEO તરીકે સફળ કામગીરી.

2011 - 2020: ઈન્ટરનેશનલ એરલાઇન્સ ગ્રુપ (IAG) ના CEO તરીકે નેતૃત્વ.

અન્ય: તેમણે એર લિંગસમાં પણ CEO તરીકે સેવાઓ આપી છે.

કંપનીના નેતૃત્વનો વિશ્વાસ

ઈન્ડિગોના ચેરમેન વિક્રમ સિંઘ મહેતાએ જણાવ્યું છે કે વિલીનો વિશાળ અનુભવ ઈન્ડિગોને આંતરરાષ્ટ્રીય સ્તરે વધુ મજબૂત બનાવવામાં નિર્ણાયક ભૂમિકા ભજવશે. તો બીજી તરફ, મેનેજિંગ ડાયરેક્ટર રાહુલ ભાટિયાએ વિલીને એક 'આઇકોનિક' લીડર ગણાવ્યા છે, જેઓ ઈન્ડિગોના પરિવર્તનના નવા તબક્કામાં નવી ઊર્જા ફૂંકશે.

આ નિમણૂક સાથે જ ભારતીય એવિએશન સેક્ટરમાં ઈન્ડિગો વધુ એક ઊંચી ઉડાન ભરવા માટે તૈયાર જણાય છે.