અમદાવાદ જિલ્લાના દસક્રોઈ તાલુકામાં સ્ટેટ મોનિટરિંગ સેલ (SMC) દ્વારા દારૂબંધીના કાયદાના કડક અમલીકરણના ભાગરૂપે એક મોટી કાર્યવાહી કરવામાં આવી છે. તારીખ 23 અને 24 માર્ચ 2026 દરમિયાન હાથ ધરવામાં આવેલા આ દરોડામાં, કાનભા પોલીસ સ્ટેશનની હદમાં આવતા ચાવલજ ગામના રામાપીર મંદિર પાસેના એક ખુલ્લા મેદાનમાં ચાલતા વિદેશી દારૂના મોટા નેટવર્કનો પર્દાફાશ થયો છે. PSI વી.એન. જાડેજાના નેતૃત્વમાં મળેલી બાતમીના આધારે જ્યારે ટીમ ઘટનાસ્થળે પહોંચી ત્યારે ત્યાં મોટા પાયે ભારતીય બનાવટના વિદેશી દારૂ (IMFL)નું કટિંગ ચાલી રહ્યું હોવાનું માલૂમ પડ્યું હતું. આ દરોડા દરમિયાન પોલીસે અંદાજે 25,793 જેટલી દારૂની બોટલો કબ્જે કરી છે, જેની બજાર કિંમત ₹92,90,900 જેટલી અંકાય રહી છે. આ જથ્થો ચંડીગઢ અને પંજાબની પ્રખ્યાત ડિસ્ટિલરીઓ જેવી કે ક્વીન ડિસ્ટિલર્સ, પેરનોડ રિકાર્ડ ઇન્ડિયા અને યુનાઈટેડ સ્પિરિટસ લિમિટેડમાં તૈયાર કરવામાં આવ્યો હોવાનું તપાસમાં બહાર આવ્યું છે.

આ ઓપરેશન દરમિયાન દારૂના જથ્થા ઉપરાંત પોલીસે ગુનામાં વપરાયેલા કુલ 6 વાહનો (કિંમત ₹42,20,000), 4 મોબાઈલ ફોન અને અન્ય રોકડ સહિત કુલ ₹1,35,57,660નો મુદ્દામાલ જપ્ત કર્યો છે. ઘટનાસ્થળેથી પોલીસે ત્રણ આરોપીઓની ધરપકડ કરી છે, જેમાં ગાંધીનગરના કરાઈ ખાતે રહેતા ભીયારામ દેવરામ ચૌધરી (જાટ), ખેડાના હલદરવાસના આનંદ દીપકભાઈ શાહ અને સ્થાનિક ચાવલજ ગામના દિનેશભાઈ કાળુભાઈ ઝાલાનો સમાવેશ થાય છે. આ તમામ આરોપીઓ વિરુદ્ધ દારૂબંધી અધિનિયમની વિવિધ કલમો સાથે ભારતીય ન્યાય સંહિતા 2023ની નવી કલમો 238 અને 111 હેઠળ ગુનો નોંધી વધુ તપાસ હાથ ધરવામાં આવી છે. પકડાયેલા આરોપીઓની પૂછપરછમાં અન્ય 9 જેટલા વોન્ટેડ શખ્સોના નામ પણ ખુલ્યા છે, જેઓ આ ગેરકાયદેસર વેપારમાં મુખ્ય ભૂમિકા ભજવતા હતા.

વોન્ટેડ આરોપીઓની યાદીમાં રાજસ્થાનના બાડમેરનો હરીશ જાટ મુખ્ય સપ્લાયર તરીકે સામે આવ્યો છે, જ્યારે કરાઈ ગાંધીનગર ખાતે રહેતા કંવરારામ ચૌધરી અને કનારામ ચૌધરી મુખ્ય રીસીવર તરીકે કાર્યરત હતા. આ ઉપરાંત દારૂ ભરેલી ટ્રકના ડ્રાઈવર, માલિક અને ચાર મજૂરોને પકડવા માટે પોલીસે ચક્રો ગતિમાન કર્યા છે. સ્ટેટ મોનિટરિંગ સેલની આ મોટી કાર્યવાહીથી બુટલેગરોમાં ફફડાટ વ્યાપી ગયો છે. હાલમાં તમામ મુદ્દામાલ અને પકડાયેલા આરોપીઓને કાનભા પોલીસ સ્ટેશન સોંપવામાં આવ્યા છે, જ્યાં પોલીસ આ સમગ્ર રેકેટના મૂળ સુધી પહોંચવા અને આંતરરાજ્ય દારૂની હેરાફેરીના નેટવર્કને તોડવા માટે ઝીણવટભરી તપાસ કરી રહી છે.