અમદાવાદ શહેરના આનંદનગર વિસ્તારમાં રહેતા 83 વર્ષીય નિવૃત્ત તબીબ પુરષોત્તમભાઈ ઠાકરસીભાઈ ભીમાણી સાયબર ગુનેગારોનો શિકાર બન્યા હોવાની ચોંકાવનારી ઘટના સામે આવી છે. આનંદનગર પોલીસ સ્ટેશનમાં નોંધાયેલી ફરિયાદ અનુસાર, અજાણ્યા ઠગોએ વૃદ્ધની જાણ બહાર તેમના બેંક ઓફ બરોડાના ખાતામાંથી ગુપ્ત માહિતી ચોરી કરી કુલ 99,000 રૂપિયાની રકમ અન્ય ખાતામાં ટ્રાન્સફર કરી લીધી હતી. આ સમગ્ર મામલો ત્યારે પ્રકાશમાં આવ્યો જ્યારે ફરિયાદીએ પોતાના પૌત્ર પાસેથી રોકડ રકમ મેળવવા માટે તેને ઓનલાઇન નાણાં મોકલવાનો પ્રયાસ કર્યો હતો. વયસ્ક નાગરિકોને નિશાન બનાવતી સાયબર ગેંગે આ વખતે ટેકનોલોજીનો દુરુપયોગ કરી મધરાતના સમયે આ ટ્રાન્જેક્શન પાર પાડ્યું હોવાનું પ્રાથમિક તપાસમાં બહાર આવ્યું છે.

ઘટનાની વિગત એવી છે કે, ગત 2 જાન્યુઆરીના રોજ પુરષોત્તમભાઈને રોકડની જરૂર હોવાથી તેમણે ઘરે આવેલા તેમના પૌત્ર અભિષેકને 34,000 રૂપિયા આપવા જણાવ્યું હતું અને તે રકમ તેના ખાતામાં ગુગલ પે દ્વારા ટ્રાન્સફર કરવાનું નક્કી કર્યું હતું. જોકે, જ્યારે પૌત્રએ ફોનથી ટ્રાન્જેક્શન કરવાનો પ્રયાસ કર્યો ત્યારે સ્ક્રીન પર 'ડેઈલી લિમિટ પૂર્ણ થઈ ગઈ છે' તેવો મેસેજ આવતા બંને ચોંકી ગયા હતા. પુરષોત્તમભાઈએ તે દિવસે કોઈને પણ નાણાં મોકલ્યા ન હોવા છતાં લિમિટ પૂરી થઈ જવાથી શંકા દ્રઢ બની હતી. ત્યારબાદ 6 જાન્યુઆરીના રોજ બેંકમાં જઈ તપાસ કરતા જાણવા મળ્યું હતું કે 2 જાન્યુઆરીની મધરાતે 00:01 વાગ્યે કોઈએ તેમના ખાતામાંથી 99,000 રૂપિયા ઉપાડી લીધા હતા.

પોતાની સાથે છેતરપિંડી થઈ હોવાનું સમજાતા વૃદ્ધે તાત્કાલિક સાયબર હેલ્પલાઇન 1930 પર જાણ કરી હતી અને ત્યારબાદ આનંદનગર પોલીસ સ્ટેશનમાં ફરિયાદ નોંધાવી હતી. પોલીસે આ મામલે ગુનો નોંધી તપાસના ચક્રો ગતિમાન કર્યા છે. જે ખાતામાં રકમ ટ્રાન્સફર થઈ છે તેના ધારક સામે પણ કાયદેસરની કાર્યવાહી કરવાની માંગ કરવામાં આવી છે. હાલમાં પોલીસ ઇન્સ્પેક્ટર રણજીતસિંહ પરમાર આ કેસની તપાસ ચલાવી રહ્યા છે અને ટેકનિકલ સર્વેલન્સની મદદથી અજાણ્યા સાયબર ઠગ સુધી પહોંચવાના પ્રયાસો હાથ ધરવામાં આવ્યા છે. આ કિસ્સાએ ડિજિટલ યુગમાં વૃદ્ધોની સુરક્ષા અને બેંકિંગ વિગતોની ગુપ્તતા જાળવવા બાબતે ફરી એકવાર લાલબત્તી ધરી છે.