અમદાવાદ : શહેરના માધવપુરા વિસ્તારમાં જાણે કાયદો અને વ્યવસ્થાનો ડર ઓસરી રહ્યો હોય તેમ જૂની અદાવતનું વેર વાળવા માટે ધોળે દિવસે નહીં પણ મધરાતે આતંક મચાવવાની ઘટના સામે આવી છે. 31 માર્ચ 2026ની મોડી રાત્રે બનેલી આ ઘટનામાં એક કિંમતી થાર ગાડીને નિશાન બનાવી નિર્મમ રીતે તોડફોડ કરવામાં આવી હતી. આ હુમલા પાછળ કોઈ સામાન્ય ઝઘડો નહીં પરંતુ વર્ષો જૂની કૌટુંબિક અદાવત અને મર્ડર કેસનો ખાર જવાબદાર હોવાનું પોલીસ તપાસમાં બહાર આવ્યું છે. ફરિયાદી જૈમિનભાઈ અને તેમના ભાઈ અતુલભાઈ રાત્રિના સમયે ખાટુશ્યામના દર્શન કરીને પવિત્ર મન સાથે ઘરે પરત ફર્યા હતા, પરંતુ તેમને અંદાજ પણ નહોતો કે સવાર પડતા જ તેમની મિલકતને વેરઝેરના કારણે નુકસાન પહોંચાડવામાં આવશે. સવારે જ્યારે જૈમિનભાઈએ ઘરની બહાર નજર કરી ત્યારે તેમની થાર ગાડીના કાચ ફૂટેલા હતા અને ગાડીની બોડી પર ઠેર-ઠેર પથ્થર અને હથિયારોના નિશાન જોઈ તેઓ સ્તબ્ધ થઈ ગયા હતા.

આ મામલે તુરંત પોલીસને જાણ કરવામાં આવતા માધવપુરા પોલીસે સીસીટીવી ફૂટેજની ઝીણવટભરી તપાસ હાથ ધરી હતી. ફૂટેજમાં સ્પષ્ટ દેખાયું હતું કે એક એક્ટિવા પર સવાર થઈને ત્રણ શખ્સો—દીપક, ગોપી અને કરણ—ઘટનાસ્થળે આવ્યા હતા અને ગાડીમાં તોડફોડ કરી ફરાર થઈ ગયા હતા. આશ્ચર્યની વાત તો એ છે કે આ હુમલાનો મુખ્ય સૂત્રધાર કરણ નામનો શખ્સ છે, જે અગાઉ ફરિયાદી જૈમિનના કાકાના દીકરાના મર્ડર કેસમાં સંડોવાયેલો ખૂંખાર આરોપી છે. કરણ હાલમાં જેલમાંથી પેરોલ પર બહાર આવ્યા બાદ પરત જેલમાં હાજર ન થઈને 'પેરોલ જમ્પ' કરી નાસતો ફરી રહ્યો હતો. આ પેરોલ જમ્પર ગુનેગારે ફરી એકવાર જૂની અદાવતનો બદલો લેવા માટે જૈમિનભાઈની ગાડીને નિશાન બનાવી વિસ્તારમાં ભયનું વાતાવરણ ઊભું કરવાનો પ્રયાસ કર્યો હતો.

પોલીસે આ મામલે ત્વરિત કાર્યવાહી કરતા બે આરોપીઓ, દીપક અને ગોપીની અટકાયત કરી લીધી છે. પકડાયેલા આરોપીઓની પૂછપરછમાં ચોંકાવનારો ખુલાસો થયો છે કે જૈમિને અગાઉ કોઈ બાબતે ગાળો આપી હોવાથી તેનાથી ઉશ્કેરાઈને અને કરણ સાથેની મિલીભગતથી આ કૃત્ય આચરવામાં આવ્યું હતું. જોકે, પોલીસ માટે અત્યારે સૌથી મોટો પડકાર મુખ્ય આરોપી કરણને ઝડપી પાડવાનો છે, જે ગુનાહિત માનસ ધરાવે છે અને કાયદાના સકંજામાંથી ભાગી છૂટવામાં સફળ રહ્યો છે. માધવપુરા પોલીસે આ ભાગેડુ પેરોલ જમ્પરને પકડવા માટે અલગ-અલગ ટીમો બનાવીને ચક્રો ગતિમાન કર્યા છે અને વિશ્વાસ અપાવ્યો છે કે આરોપી ગમે તેટલો શાણો હોય, તે લાંબો સમય પોલીસની પકડથી દૂર રહી શકશે નહીં. આ ઘટનાએ સ્થાનિક વિસ્તારમાં ચર્ચા જગાવી છે કે કેવી રીતે પેરોલ પર છૂટેલા ગુનેગારો ફરીથી ગુનાખોરીના રસ્તે ચઢીને નિર્દોષ નાગરિકોને પરેશાન કરે છે.