AIMIMના રાષ્ટ્રીય અધ્યક્ષ અસદુદ્દીન ઓવૈસીએ આજે અમદાવાદની મુલાકાત દરમિયાન ગુજરાત સરકારના 'સમાન નાગરિક સંહિતા' બિલ-2026 અને આગામી સ્થાનિક સ્વરાજ્યની ચૂંટણીઓ અંગે મહત્વના નિવેદનો આપ્યા હતા. ઓવૈસીએ UCC ને ઉત્તરાખંડના કાયદાની નકલ ગણાવીને આદિવાસીઓના અધિકારો અને નૈતિક મૂલ્યો પર સવાલો ઉઠાવ્યા હતા. આ સાથે જ તેમણે ગુજરાતમાં મનપા, જિલ્લા અને તાલુકા પંચાયતોની ચૂંટણીમાં AIMIM પૂરી તાકાત સાથે ઝંપલાવશે તેવી જાહેરાત કરીને રાજકીય ગરમાવો લાવી દીધો છે. અમદાવાદમાં યોજાયેલી બેઠક બાદ ઓવૈસીએ સ્પષ્ટ કર્યું હતું કે આગામી સ્થાનિક સ્વરાજ્યની ચૂંટણીમાં AIMIM મોટા પાયે ઉમેદવારો ઉતારશે.

તેમણે જાહેરાત કરી હતી કે પક્ષ રાજ્યભરની 332 નગરપાલિકા બેઠકો પર ચૂંટણી લડશે. આ આક્રમક રણનીતિ સૂચવે છે કે AIMIM ગુજરાતના પાયાના સ્તરે પોતાનું સંગઠન મજબૂત કરવા માંગે છે. ઓવૈસીએ વધુમાં વિગતો આપતા જણાવ્યું કે 29 તાલુકા પંચાયત અને 18 જિલ્લા પંચાયતની બેઠકો પર પણ પક્ષના ઉમેદવારો મેદાને પડશે. ખાસ કરીને અમદાવાદ સહિત રાજ્યની 6 મહાનગરપાલિકાઓમાં AIMIM ઉમેદવારો ઉભા રાખીને મુખ્ય રાજકીય પક્ષોને પડકાર આપશે. ગુજરાત વિધાનસભામાં 24 માર્ચ, 2026ના રોજ પસાર થયેલા UCC બિલ અંગે ઓવૈસીએ કેન્દ્ર અને રાજ્ય સરકાર પર નિશાન સાધ્યું હતું.

તેમણે આ બિલને ઉત્તરાખંડના કાયદાની બેઠી નકલ ગણાવી હતી અને આક્ષેપ કર્યો હતો કે હિન્દુ મેરેજ, ડિવોર્સ અને સક્સેશન એક્ટને કોઈ પણ ફેરફાર વિના બધા જ સમુદાયો પર થોપી દેવામાં આવ્યો છે. ઓવૈસીએ એક ગંભીર સવાલ ઉઠાવતા કહ્યું કે, જો રાજ્યની 16 ટકા આદિવાસી વસ્તીને આ કાયદામાંથી બાકાત રાખવામાં આવી હોય, તો પછી તેને 'સમાન' નાગરિક સંહિતા કેવી રીતે કહી શકાય? તેમના મતે, કોઈ ચોક્કસ સમુદાયને બાકાત રાખવાથી આ કાયદાનો મૂળ ઉદ્દેશ્ય જ નિષ્ફળ જાય છે. UCC હેઠળ લીવ-ઈન રિલેશનશિપના મુદ્દે ઓવૈસીએ ભાજપ અને RSS ના નૈતિક મૂલ્યો  પર કટાક્ષ કર્યો હતો.

તેમણે પ્રશ્ન કર્યો હતો કે લગ્ન વગરના સંબંધોને માન્યતા આપવી એ ભારતીય સંસ્કારોમાં કેવી રીતે યોગ્ય ગણાય? આ મુદ્દે તેમણે શાસક પક્ષની વિચારધારા સામે સવાલો ઉભા કર્યા હતા. ઓવૈસીની આ મુલાકાત અને જાહેરાતોથી આગામી ચૂંટણીઓમાં ત્રિપાંખિયો જંગ થવાના એંધાણ મળી રહ્યા છે. એક તરફ UCC મુદ્દે લઘુમતી અને આદિવાસી મતોનું ધ્રુવીકરણ કરવાનો પ્રયાસ છે, તો બીજી તરફ મોટી સંખ્યામાં બેઠકો પર ચૂંટણી લડીને AIMIM ગુજરાતમાં પોતાની મજબૂત હાજરી નોંધાવવા મચી પડી છે.