નવી દિલ્હીથી લંડન જઈ રહેલી એર ઈન્ડિયાની ફ્લાઈટમાં શંકાસ્પદ ટેકનિકલ ખામી સર્જાતા વિમાનને અધવચ્ચેથી દિલ્હી પરત ફરવું પડ્યું છે. ગુરુવારે મુસાફરોના જીવના જોખમને ટાળવા અને સુરક્ષાને સર્વોચ્ચ અગ્રતા આપીને પાયલટે આ મહત્વપૂર્ણ નિર્ણય લીધો હતો, જેના કારણે મોટી દુર્ઘટના ટળી હતી અને મુસાફરોનો આબાદ બચાવ થયો હતો.

7 કલાક હવામાં રહ્યા બાદ દિલ્હીમાં સુરક્ષિત લેન્ડિંગ

પ્રાપ્ત વિગતો અનુસાર, એર ઈન્ડિયાની ફ્લાઈટ AI111 એ ગુરુવારે સવારે લગભગ 6 વાગ્યે દિલ્હીથી લંડન માટે ઉડાન ભરી હતી. જોકે, મુસાફરી દરમિયાન વિમાનમાં અચાનક શંકાસ્પદ ટેકનિકલ સમસ્યા જણાતા પાયલટે સાવચેતીના ભાગરૂપે વિમાનને પરત દિલ્હી તરફ વાળ્યું હતું. લગભગ 7 કલાક સુધી હવામાં રહ્યા બાદ આ વિમાન બપોરે આશરે 12:30 વાગ્યે દિલ્હી એરપોર્ટ પર સુરક્ષિત રીતે લેન્ડ થયું હતું.

મુસાફરોની સુરક્ષા સર્વોચ્ચ અગ્રતા, ટેકનિકલ તપાસ શરૂ 

એર ઈન્ડિયાના સત્તાવાર પ્રવક્તાએ આ ઘટનાની પુષ્ટિ કરતા જણાવ્યું હતું કે, મુસાફરોની સુરક્ષા એરલાઇન માટે સર્વોચ્ચ અગ્રતા છે અને તેને ધ્યાનમાં રાખીને જ વિમાનને પરત લાવવાનો નિર્ણય લેવામાં આવ્યો હતો. પ્રવક્તાએ સ્પષ્ટ કર્યું કે વિમાન એરલાઇનના કડક સુરક્ષા ધોરણો અનુસાર સુરક્ષિત રીતે લેન્ડ થયું છે. હાલમાં એન્જિનિયરો દ્વારા વિમાનની વિગતવાર ટેકનિકલ તપાસ કરવામાં આવી રહી છે. એરલાઇને મુસાફરોને પડેલી અણધારી અસુવિધા બદલ ખેદ વ્યક્ત કર્યો છે અને તેઓ વહેલી તકે પોતાની લંડનની યાત્રા પૂર્ણ કરી શકે તે સુનિશ્ચિત કરવા તમામ સંભવિત પ્રયાસો હાથ ધર્યા છે.

ગત સપ્તાહે વેનકુવર ફ્લાઈટ પણ 9 કલાક બાદ પરત ફરી હતી 

એર ઈન્ડિયાની ફ્લાઈટ અધવચ્ચેથી પરત ફરવાની આ કોઈ પ્રથમ ઘટના નથી. ગત સપ્તાહે 20 માર્ચના રોજ પણ દિલ્હીથી કેનેડાના વેનકુવર માટે ઉડેલી એર ઈન્ડિયાની ફ્લાઈટ 9 કલાકની ઉડાન બાદ રાષ્ટ્રીય રાજધાની પરત ફરી હતી. બપોરે 12.18 વાગ્યે બોઈંગ 777-200LR પ્લેનનો ઉપયોગ કરીને આ ફ્લાઈટે ઉડાન ભરી હતી. પરંતુ કેનેડાના એવિએશન રેગ્યુલેટર તરફથી આ રૂટ પર માત્ર બોઈંગ 777-300ER વિમાનોને જ મંજૂરી હોવાથી, ક્લિયરન્સના અભાવે વિમાનને અધવચ્ચેથી પરત ફરવાની ફરજ પડી હતી.