બોલિવૂડના ખિલાડી અક્ષય કુમાર અને પ્રતિભાશાળી અભિનેત્રી વિદ્યા બાલન વર્ષો પછી ફરી એકવાર મોટા પડદા પર સાથે જોવા મળવાના છે. અનીસ બાઝમીના નિર્દેશનમાં બની રહેલી આ ફિલ્મનું ટાઈટલ 'રામ ઔર શ્યામ' નક્કી કરવામાં આવ્યું હોવાનું જાણવા મળ્યું છે. આ સમાચાર આવતાની સાથે જ અક્ષય અને વિદ્યાના ચાહકોમાં ભારે ઉત્સાહ જોવા મળી રહ્યો છે, કારણ કે આ હિટ જોડી લાંબા સમય બાદ સાથે કામ કરી રહી છે. જોકે ફિલ્મનું નામ દિલીપ કુમારની 1967ની ક્લાસિક ફિલ્મ 'રામ ઔર શ્યામ' જેવું જ રાખવામાં આવ્યું છે, પરંતુ સર્જકોએ સ્પષ્ટતા કરી છે કે આ ફિલ્મને જૂની ફિલ્મની વાર્તા સાથે કોઈ જ લેવાદેવા નથી.

અનીસ બાઝમી આ વખતે એક તદ્દન નવો અને અલગ વિષય લઈને આવી રહ્યા છે. આ ફિલ્મમાં અનીસ બાઝમીની આગવી સ્ટાઈલ મુજબ કોમેડી અને ડ્રામાનું મિશ્રણ જોવા મળી શકે છે. ફિલ્મના શૂટિંગની વાત કરીએ તો, શૂટિંગનો પ્રથમ તબક્કો સફળતાપૂર્વક પૂર્ણ કરી લેવામાં આવ્યો છે. હવે ફિલ્મના આગળના ભાગનું શૂટિંગ મુંબઈની નજીક આવેલા કર્જતમાં કરવામાં આવશે. નિર્માતાઓ દ્વારા કર્જતમાં મોટા પાયે તૈયારીઓ કરી લેવામાં આવી છે અને ટૂંક સમયમાં જ સ્ટાર કાસ્ટ ત્યાં શૂટિંગ માટે રવાના થશે. અક્ષય અને અનીસ બાઝમી પણ ઘણા વર્ષો પછી આ પ્રોજેક્ટ દ્વારા ફરી સાથે આવ્યા છે.

આ ફિલ્મમાં વિદ્યા બાલન સિવાય બીજી હિરોઈન તરીકે દક્ષિણ ભારતની જાણીતી અભિનેત્રી રાશિ ખન્ના પણ જોવા મળશે. આ ઉપરાંત, બોલિવૂડના દિગ્ગજ અભિનેતા વિજય રાઝ પણ આ ફિલ્મમાં એક અત્યંત મહત્વની અને મનોરંજક ભૂમિકામાં નજર આવશે. આ મજબૂત સ્ટાર કાસ્ટને કારણે ફિલ્મ પ્રત્યેની અપેક્ષાઓ વધી ગઈ છે. ઉલ્લેખનીય છે કે, અક્ષય કુમાર અને વિદ્યા બાલને અગાઉ 'હે બેબી', 'ભૂલ ભૂલૈયા' અને 'મિશન મંગલ' જેવી સુપરહિટ ફિલ્મોમાં સાથે કામ કર્યું છે. તેમની ઓન-સ્ક્રીન કેમિસ્ટ્રી પ્રેક્ષકોને હંમેશા પસંદ આવી છે. હવે જોવાનું એ રહેશે કે 'રામ ઔર શ્યામ' દ્વારા આ જોડી ફરી એકવાર બોક્સ ઓફિસ પર કેવો જાદુ ચલાવે છે.