બોલિવૂડના મહાનાયક અમિતાભ બચ્ચન સોશિયલ મીડિયા પર અવારનવાર પોતાના વિચારો શેર કરતા રહે છે, પરંતુ તાજેતરમાં તેમણે કરેલી એક પોસ્ટ ચાહકોને વિચારતા કરી દીધા છે. સફળતાના શિખરે હોવા છતાં બિગ બીએ જીવનની મંઝિલ, રસ્તાઓ અને અસ્તિત્વ વિશે ઊંડું આત્મમંથન કર્યું છે. અમિતાભ બચ્ચને જણાવ્યું કે તેમણે તેમનો આખો દિવસ અત્યંત શાંતિમાં અને એકાંતમાં વિતાવ્યો હતો. આ સમય દરમિયાન તેમણે કોઈ બીજા સાથે નહીં, પરંતુ પોતાની જાત સાથે પ્રશ્ન-જવાબ કર્યા હતા.

તેમણે પોતાની પોસ્ટમાં સંકેત આપ્યો કે દુનિયાની ભીડ અને લાઈમલાઈટથી દૂર જઈને પોતાની અંતરાત્મા સાથે વાત કરવી કેટલી જરૂરી છે. બિગ બીએ જિંદગીના સફર વિશે લખ્યું કે, "આપણે આખો દિવસ દોડીએ છીએ, રસ્તાઓ બદલીએ છીએ, પણ મંઝિલ ક્યાં છે?" તેમણે જીવનની ક્ષણભંગુરતા પર ભાર મૂકતા લખ્યું કે, "આપણે ખાલી હાથે આવ્યા હતા અને ખાલી હાથે જ જવાનું છે." આ પંક્તિઓ દ્વારા તેમણે સમજાવ્યું કે ભૌતિક સુખ-સુવિધાઓ અને સંપત્તિ કાયમી નથી.

પોતાના બ્લોગ અને સોશિયલ મીડિયા હેન્ડલ પર તેમણે શેર કર્યું કે કેવી રીતે એકાંતમાં વિતાવેલો સમય તેમને આંતરિક શાંતિ આપે છે. તેમણે પોતાની જાતને પૂછેલા ગૂઢ પ્રશ્નો દ્વારા એ સાબિત કર્યું કે ભલે વ્યક્તિ ગમે તેટલી સફળ હોય, પણ અંતે તે જીવનના પાયાના સત્ય સામે નતમસ્તક થાય છે.  બિગ બીની આ પોસ્ટ સોશિયલ મીડિયા પર વાયરલ થઈ રહી છે. હજારો ચાહકો આ પોસ્ટ પર કોમેન્ટ કરી રહ્યા છે કે, આટલા મોટા કલાકાર હોવા છતાં તેમની સાદગી અને જમીન સાથે જોડાયેલા વિચારો પ્રેરણાદાયક છે. ઘણા લોકો આને 'સદીના મહાનાયકનું જીવન દર્શન' ગણાવી રહ્યા છે.