અમરેલી જિલ્લાના ખેડૂતો માટે આજનો દિવસ આશાનું નવું કિરણ લઈને આવ્યો છે. છેલ્લા કેટલાક સમયથી કમોસમી વરસાદ અને કુદરતી આફતોના કારણે આર્થિક ભીંસ અનુભવી રહેલા ધરતીપુત્રો માટે રાજ્ય સરકાર દ્વારા ટેકાના ભાવે ચણાની ખરીદીનો વિધિવત પ્રારંભ કરવામાં આવ્યો છે. આજે 7મી એપ્રિલના રોજ અમરેલીના મુખ્ય માર્કેટિંગ યાર્ડ ખાતે શાસ્ત્રોક્ત વિધિ મુજબ શ્રીફળ ફોડીને આ ખરીદી પ્રક્રિયાને ખુલ્લી મુકવામાં આવી હતી. આ અવસરે APMCના હોદ્દેદારો અને ગુજકોમાસોલના પ્રતિનિધિઓની પ્રેરક ઉપસ્થિતિ રહી હતી. ખરીદી શરૂ થતાની સાથે જ જિલ્લાના વિવિધ સેન્ટરો પર ચણાની ગુણીઓના ઢગલા જોવા મળ્યા હતા, જે દર્શાવે છે કે ખેડૂતોમાં આ સરકારી વ્યવસ્થા પ્રત્યે કેટલો ઉત્સાહ છે. ખાસ કરીને અમરેલી, સાવરકુંડલા, બગસરા, ધારી અને ખાંભા જેવા કેન્દ્રો પર સવારથી જ ખેડૂતો પોતાના ટ્રેક્ટરો ભરીને લાઇનબદ્ધ થયેલા જોવા મળ્યા હતા.

આ સમયે ગુજકોમાસોલના પ્રતિનિધિ હેનીસ રામાણીએ જણાવ્યું હતું કે, સરકાર દ્વારા નક્કી કરવામાં આવેલા ધારાધોરણો મુજબ નાફેડના માધ્યમથી આ કામગીરી હાથ ધરવામાં આવી રહી છે. જે અંતર્ગત ખેડૂત દીઠ 2 હેક્ટરની મર્યાદા રાખવામાં આવી છે અને પ્રતિ હેક્ટર 90 મણ ચણાની ખરીદી કરવાનું આયોજન છે. 

બજારમાં ચણાના ભાવ અત્યારે પ્રતિ મણ 850 થી 1020  રૂપિયાની આસપાસ ચાલી રહ્યા છે, જ્યારે સરકાર દ્વારા ટેકાનો ભાવ 1175 રૂપિયા નિર્ધારિત કરવામાં આવ્યો છે. આમ, ખેડૂતોને ખુલ્લા બજાર કરતા મણે 150 થી 300 રૂપિયા જેટલો માતબર ફાયદો સીધો મળી રહ્યો છે. આ આર્થિક તફાવત ખેડૂતો માટે બિયારણ, ખાતર અને મોંઘી મજૂરીના ખર્ચને સરભર કરવામાં ખૂબ જ મદદરૂપ સાબિત થશે, જેના કારણે ખેડૂતોમાં સંતોષની લાગણી વ્યાપી ગઈ છે.

જિલ્લાભરમાં ઓનલાઈન રજિસ્ટ્રેશનની વાત કરીએ તો સાવરકુંડલા તાલુકો સમગ્ર જિલ્લામાં મોખરે રહ્યો છે, જ્યાં 6200 જેટલા ખેડૂતોએ ટેકાના ભાવે પોતાનો પાક વેચવા માટે નોંધણી કરાવી છે. કમોસમી વરસાદના કારણે પાકની ગુણવત્તા અને ઉતારા પર જે અસર પડી હતી, તેની સામે આ ભાવ આશીર્વાદ સમાન છે. જોકે, કેટલાક ખેડૂતોએ એવી પણ માંગ કરી છે કે જો ખરીદીની મર્યાદામાં થોડો વધારો કરવામાં આવે તો વધુમાં વધુ ખેડૂતોને લાભ મળી શકે.

હાલમાં વહીવટી તંત્ર દ્વારા તોલ-માપની પ્રક્રિયા અત્યંત પારદર્શક અને ઝડપી બનાવવામાં આવી છે જેથી ખેડૂતોને લાંબો સમય તડકામાં ઉભા ન રહેવું પડે. માર્કેટિંગ યાર્ડમાં પીવાના પાણી અને છાંયડાની પણ યોગ્ય વ્યવસ્થા કરવામાં આવી છે, જેનાથી વ્યવસ્થા જળવાઈ રહી છે.