અમરેલી જિલ્લાના લાઠી તાલુકાના ચાવંડ ગામ નજીક 30 માર્ચની વહેલી સવારે એક ખાનગી લક્ઝરી બસ પલટી ખાઈ જવાની ઘટના બની છે. ભાવનગરથી લગ્નપ્રસંગ પૂર્ણ કરીને જામનગર પરત ફરી રહેલી આ બસના ડ્રાઈવરને ઊંઘનું ઝોકું આવી જતાં આ ગંભીર અકસ્માત સર્જાયો હતો. સદનસીબે આ દુર્ઘટનામાં કોઈ જાનહાનિ નોંધાઈ નથી, પરંતુ બસમાં સવાર 25 જેટલા જાનૈયાઓને ઈજા પહોંચી છે.

ડ્રાઈવરને ઝોકું આવતાં સર્જાયો અકસ્માત 

પ્રાપ્ત વિગતો અનુસાર, જામનગરનો એક પરિવાર ભાવનગર ખાતે લગ્નપ્રસંગમાં હાજરી આપવા ગયો હતો. લગ્ન પૂર્ણ થયા બાદ 30 માર્ચની વહેલી સવારે તેઓ 'પાર્થ ટ્રાવેલ્સ' ની ખાનગી બસમાં જામનગર જવા રવાના થયા હતા. આ દરમિયાન લાઠી તાલુકાના ચાવંડ ગામ નજીક પહોંચતા બસના ચાલકને અચાનક ઊંઘનું ઝોકું આવી ગયું હતું. પરિણામે ડ્રાઈવરે સ્ટીયરિંગ પરથી કાબૂ ગુમાવતા બસ રોડ પર જ પલટી મારી ગઈ હતી. અકસ્માત સમયે બસમાં અંદાજે 40 જેટલા લોકો સવાર હતા.

ઘટનાસ્થળે મચી દોડધામ, 25 જાનૈયાઓ ઈજાગ્રસ્ત 

વહેલી સવારે બનેલી આ ઘટનાને પગલે બસમાં સવાર મુસાફરોમાં ભારે દેકારો અને ચિચિયારીઓ મચી ગઈ હતી. અકસ્માતની જાણ થતાં જ આસપાસના લોકો અને રાહદારીઓ મદદે દોડી આવ્યા હતા. આ ઘટનામાં 25 જેટલા મુસાફરોને ઈજાઓ પહોંચી હતી. તાત્કાલિક 108 ઇમરજન્સી એમ્બ્યુલન્સ સેવાને જાણ કરવામાં આવતા ઈજાગ્રસ્તોને સારવાર માટે લાઠી, બાબરા અને ઢસા સહિતની નજીકની સરકારી અને ખાનગી હોસ્પિટલોમાં ખસેડવામાં આવ્યા હતા.

લાઠી પોલીસે ઘટનાસ્થળે પહોંચી તપાસ હાથ ધરી 

બસ પલટી જવાની આ દુર્ઘટનાની જાણ થતાં જ લાઠી પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે ટ્રાફિક વ્યવસ્થા પૂર્વવત કરાવીને અકસ્માતનો ગુનો નોંધવાની તજવીજ હાથ ધરી છે. પ્રાથમિક તપાસમાં ડ્રાઈવરની બેદરકારી અને ઊંઘના કારણે જ અકસ્માત સર્જાયો હોવાનું સામે આવ્યું છે. સદનસીબે તમામ ઈજાગ્રસ્તોને માત્ર સામાન્ય ઈજાઓ જ પહોંચી હોવાથી એક મોટી જાનહાનિ ટળતા વહીવટી તંત્ર અને પરિવારે રાહતનો શ્વાસ લીધો છે. પોલીસ હવે બસ ડ્રાઈવરની પૂછપરછ કરી કાયદેસરની કાર્યવાહી આગળ વધારી રહી છે.