અમરેલી જિલ્લામાં માદક દ્રવ્યોના વેચાણ અને ઉત્પાદનને નાબૂદ કરવાના અભિયાન હેઠળ સ્પેશિયલ ઓપરેશન ગ્રુપએ મોટી સફળતા મેળવી છે. લાઠી તાલુકાના ચાવંડ રોડ પર આવેલી એક વાડીમાં ગેરકાયદેસર રીતે કરવામાં આવતી ગાંજાની ખેતી પર પોલીસે દરોડો પાડીને નશાના કારોબારનો પર્દાફાશ કર્યો છે. અમરેલી એસ.ઓ.જી.ની ટીમને ખાનગી રાહે ચોક્કસ બાતમી મળી હતી કે, લાઠી-ચાવંડ રોડ પર આવેલી ધીરુભાઈ કોટડીયા નામની વ્યક્તિની વાડીમાં પ્રતિબંધિત માદક દ્રવ્ય ગાંજાનું વાવેતર કરવામાં આવ્યું છે.

આ બાતમીને આધારે પોલીસે વ્યૂહાત્મક રીતે વાડીમાં સર્ચ ઓપરેશન હાથ ધર્યું હતું. પોલીસ તપાસ દરમિયાન જાણવા મળ્યું કે, વાડી માલિક દ્વારા કપાસ અથવા અન્ય પાકની આડમાં છુપી રીતે ગાંજાના છોડ ઉગાડવામાં આવ્યા હતા જેથી કોઈને શંકા ન જાય. દરોડા દરમિયાન ખેતરમાંથી ગાંજાના નાના-મોટા કુલ 6 છોડ મળી આવ્યા હતા, જે લહેરાતા જોઈ પોલીસ પણ ચોંકી ઉઠી હતી. એસ.ઓ.જી.ની ટીમે સ્થળ પરથી આશરે 12 કિલો જેટલો લીલો ગાંજો જપ્ત કર્યો છે. પોલીસના અંદાજ મુજબ આ જપ્ત કરાયેલા માદક દ્રવ્યની બજાર કિંમત અંદાજે 6 લાખ રૂપિયાથી વધુ આંકવામાં આવી રહી છે. પોલીસે તમામ મુદ્દામાલ કબજે કરી કાયદેસરની સીઝર પ્રક્રિયા હાથ ધરી છે.

આ ગેરકાયદેસર પ્રવૃત્તિમાં સીધી સંડોવણી બદલ વાડીના માલિક ધીરુભાઈ કોટડીયાની સ્થળ પરથી જ અટકાયત કરવામાં આવી છે. આરોપીની પ્રાથમિક પૂછપરછમાં આ ગાંજાનું વાવેતર ક્યારથી કરવામાં આવ્યું હતું અને તેનો ઉપયોગ ક્યાં થવાનો હતો તે દિશામાં તપાસ તેજ કરવામાં આવી છે. અમરેલી પોલીસની આ આક્રમક કામગીરીને પગલે જિલ્લાના નશાના કારોબારીઓમાં ભારે ફફડાટ વ્યાપી ગયો છે. ઉચ્ચ પોલીસ અધિકારીઓએ જણાવ્યું છે કે, આગામી દિવસોમાં પણ આવા અસામાજિક તત્વો અને માદક દ્રવ્યોના વેપાર સામે ઝીરો ટોલરન્સની નીતિ સાથે કડક કાર્યવાહી ચાલુ રહેશે.