અમરેલી જિલ્લાના સાવરકુંડલા તાલુકાના મિતિયાળા પંથકમાં છેલ્લા કેટલાક સમયથી ધરતીના પેટાળમાં થઈ રહેલી હલચલને કારણે ભૂકંપના હળવા આંચકાઓનો સિલસિલો યથાવત છે. માત્ર 30 કલાકના ટૂંકા ગાળામાં જ આ વિસ્તારમાં ભૂકંપના 14 જેટલા આંચકા અનુભવાતા સ્થાનિક લોકોમાં ભારે ભયનો માહોલ ફેલાયો છે. ગાંધીનગર સિસ્મોલોજી વિભાગે પણ આ ભૂકંપના આંચકાઓની સત્તાવાર પુષ્ટિ કરી છે.

પેટાળમાં 10 કિ.મી. ની ઊંડાઈએ સતત હલચલ

પ્રાપ્ત માહિતી મુજબ, મિતિયાળા પંથકમાં જમીનની અંદર 10 કિલોમીટરની ઊંડાઈ પર સતત ભૌગોલિક હલચલ જોવા મળી રહી છે. આ હલચલના પરિણામે ભૂકંપના હળવા આંચકા આવી રહ્યા છે. એક પખવાડિયાના સમયગાળા દરમિયાન અગાઉ બે વખત ભૂકંપના આંચકા આવ્યા હતા, ત્યારબાદ ગઈકાલથી ફરી એકવાર ધરતીકંપનો આ સિલસિલો શરૂ થયો છે, જેણે લોકોની ઊંઘ હરામ કરી દીધી છે.

રાત્રિથી સવાર સુધીમાં ક્યારે આવ્યા આંચકા?

ગઈકાલ રાતથી લઈને આજ સવાર સુધીના સમયગાળામાં ભૂકંપના 7 આંચકા નોંધાયા છે, જ્યારે તેની આગલી રાત્રે પણ 7 આંચકા અનુભવાયા હતા. આમ, કુલ 30 કલાકમાં 14 વખત ધરતી ધ્રુજી હતી. સિસ્મોલોજી વિભાગના આંકડા મુજબ, મધરાત્રે 1:14 મિનિટે સૌથી વધુ 3 ની તીવ્રતાનો આંચકો નોંધાયો હતો. ત્યારબાદ રાત્રે 1:37 મિનિટે 1.1 ની તીવ્રતાનો અને આજે સવારે 8:58 મિનિટે 1.5 ની તીવ્રતાનો હળવો આંચકો આવ્યો હતો.

આસપાસના ગામોમાં પણ અસર અને મકાનોમાં તિરાડો

ભૂકંપની અસર માત્ર મિતિયાળા પૂરતી સીમિત નથી રહી. મિતિયાળાની સાથે આસપાસના ગામો જેવા કે ભાડ, વાંકિયા, ધજડી, સાકરપરા અને ઈંગોરાળામાં પણ આંચકાનો સ્પષ્ટ અનુભવ થયો હતો. વારંવાર આવી રહેલા આ આંચકાઓને કારણે ગ્રામજનોમાં ગભરાટ છે. સ્થાનિક લોકોના જણાવ્યા અનુસાર, સતત ધરતીકંપના કારણે ગામના કેટલાક મકાનોની દીવાલોમાં તિરાડો પડવાનું શરૂ થયું છે. જોકે, રાહતની વાત એ છે કે આંચકાઓની તીવ્રતા ઓછી હોવાથી હજુ સુધી કોઈ મોટું નુકસાન કે જાનહાનિ થઈ નથી.