ઓટિઝમ અને ADHD જેવી ન્યુરોલોજીકલ સ્થિતિઓ સાથે સંઘર્ષ કરી રહેલા બાળકો માટે આધુનિક સમયમાં એક્વાથેરાપી એક આશાનું કિરણ બનીને ઉભરી છે. સામાન્ય રીતે ઓટિઝમ ધરાવતા બાળકો શારીરિક રીતે સક્ષમ હોવા છતાં માનસિક અસ્થિરતા, એકાગ્રતાનો અભાવ અને સામાજિક સંપર્ક સ્થાપિત કરવામાં ભારે મુશ્કેલી અનુભવતા હોય છે. આવા બાળકોના સર્વાંગી વિકાસ માટે અત્યાર સુધી સેનસરી, ઓક્યુપેશનલ અને બિહેવિયરલ થેરાપીનો ઉપયોગ થતો આવ્યો છે, પરંતુ હવે તેમાં જળચિકિત્સા એટલે કે એક્વાથેરાપીનો ઉમેરો થતાં આશ્ચર્યજનક પરિણામો મળી રહ્યા છે. પાણીના કુદરતી ગુણધર્મો બાળકના સ્નાયુઓને આરામ આપવાની સાથે તેના મગજને શાંત કરવામાં મદદરૂપ થાય છે, જેના કારણે બાળક વધુ સજાગ અને સક્રિય બને છે.

સ્વિમિંગ પૂલમાં વિતાવવામાં આવતો સમય માત્ર મનોરંજન નથી, પરંતુ એક સુનિયોજિત ઉપચાર પદ્ધતિ છે જે બાળકની શારીરિક અને માનસિક ક્ષમતાઓને સીધી અસર કરે છે. જ્યારે બાળક પાણીમાં હલનચલન કરે છે, ત્યારે તેના આખા શરીરના સ્નાયુઓને યોગ્ય શ્રમ મળે છે, જે હાઇપર એક્ટિવિટી ઘટાડવામાં અત્યંત અસરકારક સાબિત થાય છે. આ પ્રક્રિયા દરમિયાન બાળકમાં આઈ કોન્ટેક્ટ સુધરવો, સૂચનાઓનું પાલન કરવું અને અન્ય વ્યક્તિઓ સાથે સંવાદ સાધવાની ક્ષમતા કેળવાય છે. ખાસ કરીને જે બાળકો બોલવામાં અચકાતા હોય અથવા સ્પીચની સમસ્યા ધરાવતા હોય, તેમનામાં એક્વાથેરાપી બાદ આત્મવિશ્વાસ વધતા તેમની વાણી અને કોમ્યુનિકેશન સ્કિલ્સમાં નોંધપાત્ર પ્રગતિ જોવા મળી છે. આ ઉપરાંત, પાણીમાં રહેવાથી મળતી શાંતિ બાળકને માનસિક શિસ્ત અને જીવનમાં નિયમિતતા લાવવામાં પણ મદદ કરે છે.

અમદાવાદ અને ગુજરાતમાં વધતી સંખ્યા કેટલી? 
ગુજરાતમાં ઓટિઝમનું પ્રમાણ ચિંતાજનક રીતે વધી રહ્યું છે, જ્યાં એકલા અમદાવાદમાં જ આશરે 50,000થી વધુ અને સમગ્ર રાજ્યમાં 10 લાખથી વધુ બાળકો આ સ્થિતિનો સામનો કરી રહ્યા છે. આ આંકડાઓ દર્શાવે છે કે પરંપરાગત સારવારની સાથે આવી નવીન થેરાપીઓની કેટલી જરૂરિયાત છે. 

ઓટિઝમ પીડિત બાળકો માટે શારીરિક અને માનસિક સંતુલન જાળવવાનું શ્રેષ્ઠ ઉપચાર

છેલ્લા 15 વર્ષથી આ ક્ષેત્રમાં કાર્યરત નિષ્ણાત કોચ અમલ ઉપાધ્યાયે અત્યાર સુધીમાં 10,000થી વધુ વિશેષ બાળકોને એક્વાથેરાપીના માધ્યમથી નવું જીવન આપ્યું છે. તેમના બહોળા અનુભવ મુજબ, પાણી સાથેનો સંપર્ક આ બાળકોના જીવનમાં સકારાત્મકતા લાવે છે અને જે સુધારો અન્ય પદ્ધતિઓથી લાંબા ગાળે મળે છે, તે એક્વાથેરાપીના સંયોજનથી વધુ ઝડપથી અને અસરકારક રીતે મેળવી શકાય છે. આમ, આધુનિક વિજ્ઞાન અને પાણીના પ્રાકૃતિક તત્વોનો સમન્વય ઓટિઝમ પીડિત બાળકો માટે શારીરિક અને માનસિક સંતુલન જાળવવાનું શ્રેષ્ઠ સાધન બની રહ્યું છે.