ભારતના ત્રણ મહત્વના રાજ્યો અસમ, કેરળ અને કેન્દ્રશાસિત પ્રદેશ પુડુચેરીમાં આજે નવી સરકાર ચૂંટવા માટે વહેલી સવારથી જ ભારે મતદાન થઈ રહ્યું છે. ચૂંટણી પંચ દ્વારા જાહેર કરવામાં આવેલા તાજેતરના આંકડાઓ મુજબ, સવારે 9 વાગ્યા સુધીમાં ત્રણેય વિસ્તારોમાં મતદારોનો ભારે ઉત્સાહ જોવા મળ્યો હતો, જેમાં અસમમાં સૌથી વધુ 17.87 ટકા મતદાન નોંધાયું છે, જ્યારે પુડુચેરીમાં 17.41 ટકા અને કેરળમાં 16.23 ટકા મતદાન થયું છે. કુલ 5.3 કરોડથી વધુ મતદારો આજે ઈવીએમ (EVM)નું બટન દબાવીને ઉમેદવારોના ભવિષ્યનો ફેંસલો કરવા તૈયાર છે. સવારથી જ મતદાન મથકો પર લાંબી કતારો જોવા મળી રહી છે, જે લોકશાહી પ્રત્યે જનતાની જાગૃતિ દર્શાવે છે.

અસમ રાજ્યની વાત કરીએ તો અહીં કુલ 126 વિધાનસભા બેઠકો માટે મતદાન પ્રક્રિયા શરૂ થઈ છે. આ ચૂંટણીમાં ભાજપના નેતૃત્વ હેઠળનું એનડીએ (NDA) ગઠબંધન સતત ત્રીજી વખત સત્તાના સિંહાસન પર બેસવા માટે પ્રયત્નશીલ છે, જ્યારે સામે પક્ષે કોંગ્રેસના નેતૃત્વમાં રાયજોર દળ અને સીપીઆઈ(એમ) જેવી પાર્ટીઓનું મજબૂત ગઠબંધન મેદાનમાં છે. અસમમાં 2.5 કરોડથી વધુ મતદારો 722 ઉમેદવારોના ભાવિનો નિર્ણય લેશે. આ રાજ્યમાં હિંસા વગર અને શાંતિપૂર્ણ રીતે મતદાન ચાલે તે માટે કડક સુરક્ષા વ્યવસ્થા ગોઠવવામાં આવી છે. મતોની ગણતરી આગામી 4 મેના રોજ હાથ ધરવામાં આવશે, જેના પર સમગ્ર દેશની નજર ટકેલી છે.

બીજી તરફ, દક્ષિણ ભારતના રાજ્ય કેરળમાં 140 વિધાનસભા બેઠકો માટે જંગ જામ્યો છે. અહીં 2 કરોડથી વધુ મતદારો 883 ઉમેદવારોના નસીબનો ફેંસલો કરી રહ્યા છે. કેરળની રાજનીતિમાં આ વખતે ત્રિપાંખિયો જંગ જોવા મળી રહ્યો છે, જેમાં સત્તાધારી લેફ્ટ ડેમોક્રેટિક ફ્રન્ટ (LDF), કોંગ્રેસની આગેવાની હેઠળનું યુનાઇટેડ ડેમોક્રેટિક ફ્રન્ટ (UDF) અને ભાજપ પ્રેરિત એનડીએ (NDA) વચ્ચે રસાકસી છે.

તેવી જ રીતે પુડુચેરીમાં પણ 30 બેઠકો માટે મતદાન થઈ રહ્યું છે, જ્યાં 9 લાખથી વધુ મતદારો ઓલ ઈન્ડિયા એનઆર કોંગ્રેસ, ભાજપ અને કોંગ્રેસ-ડીએમકે ગઠબંધન વચ્ચેના ઉમેદવારોની કસોટી કરશે. આજના મતદાન બાદ તમામ દિગ્ગજ નેતાઓના ભાવિ મતદાન પેટીમાં કેદ થઈ જશે.