ઇરાકની રાજધાની બગદાદમાં પરિસ્થિતિ અત્યંત તંગ બની છે. બગદાદ સ્થિત યુએસ દૂતાવાસે એક તાત્કાલિક સુરક્ષા ચેતવણી જારી કરીને આગામી 24 થી 48 કલાકમાં ઈરાન-સંબંધિત ઇરાકી લશ્કરી જૂથો દ્વારા મધ્ય બગદાદમાં મોટા હુમલાની આશંકા વ્યક્ત કરી છે. પરિસ્થિતિની ગંભીરતાને જોતા અમેરિકાએ પોતાના તમામ નાગરિકોને તાત્કાલિક ઇરાક છોડવા માટે કડક નિર્દેશ આપ્યો છે.

સંભવિત લક્ષ્યાંકો અને નકલી ઓળખથી અપહરણનો ખતરો 

દૂતાવાસની સત્તાવાર ચેતવણી અનુસાર, આ હુમલાઓના સંભવિત લક્ષ્યોમાં અમેરિકન નાગરિકો, રાજદ્વારી ઇમારતો, વ્યવસાયો, યુનિવર્સિટીઓ, ઉર્જા માળખા, હોટલ, એરપોર્ટ, ઇરાકી સરકારી ઇમારતો અને નાગરિક વિસ્તારોનો સમાવેશ થાય છે. દૂતાવાસે ખાસ ચેતવણી આપી છે કે લશ્કરી જૂથોના સભ્યો સત્તાવાર અધિકારીઓ તરીકેની નકલી ઓળખ ઊભી કરીને નાગરિકોના અપહરણનો પણ પ્રયાસ કરી શકે છે. ભૂતકાળમાં પણ આ જૂથોએ કુર્દીસ્તાન ક્ષેત્ર સહિત સમગ્ર ઇરાકમાં અમેરિકા સાથે જોડાયેલા સ્થળો અને યુએસ નાગરિકો પર વ્યાપક હુમલાઓ કર્યા છે.

'મુસાફરી ન કરો' ની સલાહ: રોડ માર્ગ જ એકમાત્ર વિકલ્પ 

યુએસ સ્ટેટ ડિપાર્ટમેન્ટે લેવલ 4 ની "મુસાફરી ન કરો" સલાહનો હવાલો આપીને તમામ અમેરિકન નાગરિકોને વહેલી તકે ઇરાક છોડવા વિનંતી કરી છે. હાલમાં ઇરાકી હવાઈ ક્ષેત્ર સંપૂર્ણપણે બંધ હોવાથી હવાઈ મુસાફરી શક્ય નથી. આથી, ઇરાકમાંથી બહાર નીકળવા માટે જોર્ડન, કુવૈત, સાઉદી અરેબિયા અને તુર્કી તરફના માર્ગો (ઓવરલેન્ડ રૂટ) જ એકમાત્ર વિકલ્પ બચ્યા છે. જોકે, દૂતાવાસે સ્પષ્ટ કર્યું છે કે સરહદ ક્રોસિંગ પર ભારે ભીડ અને વિલંબ થવાની પૂરી અપેક્ષા છે.

ઈરાન-સંલગ્ન ઇરાકી લશ્કરી જૂથોનો ઘાતક ઈતિહાસ 

અમેરિકન દળોને નિશાન બનાવનારા આ ઈરાન-સંલગ્ન ઇરાકી લશ્કરી જૂથોમાં 'કતૈબ હિઝબુલ્લાહ' અને 'હરકત અલ નુજાબા' મુખ્ય છે, જે 'પોપ્યુલર મોબિલાઇઝેશન ફોર્સિસ' ના છત્ર હેઠળ કાર્ય કરે છે. પશ્ચિમ એશિયામાં ચાલી રહેલા તણાવ વચ્ચે આ જૂથો અગાઉ પણ યુએસ દળો પર રોકેટ, ડ્રોન અને રસ્તાની બાજુમાં બોમ્બ ગોઠવીને ઘાતક હુમલાઓ કરી ચૂક્યા છે.