બેંગલુરુના બહારના વિસ્તારમાં આવેલી એક ખાનગી મેડિકલ કોલેજમાં ગુરુવારે એક ચોંકાવનારી ઘટના સામે આવી છે. અહીં એક પ્રોફેસરે ચાલુ ક્લાસમાં પોતાની જ એક વિદ્યાર્થિનીને કથિત રીતે પ્રપોઝ કરતા ભારે હોબાળો મચી ગયો હતો. આ ઘટના બાદ રોષે ભરાયેલી વિદ્યાર્થિની અને અન્ય વિદ્યાર્થીઓએ પ્રોફેસર પર હુમલો કરી દીધો હતો. હાલ પોલીસે આ સમગ્ર મામલે તપાસ હાથ ધરી છે.

ચાલુ ક્લાસમાં ચોકલેટ આપીને કહ્યું 'આઈ લવ યુ' 

પોલીસના જણાવ્યા અનુસાર, નેલમંગલા ગ્રામીણ પોલીસ સ્ટેશન વિસ્તારમાં આવેલી કોલેજમાં લેક્ચર ચાલી રહ્યું હતું. ત્યારે પ્રોફેસરે કથિત રીતે આખા ક્લાસની સામે એક વિદ્યાર્થિનીને ચોકલેટ આપીને પોતાની લાગણી વ્યક્ત કરી હતી. વાયરલ થયેલા એક વીડિયો મુજબ, પ્રોફેસરે ક્લાસમાં કહ્યું હતું કે તે આ બેચની એક ખૂબ જ મહત્વપૂર્ણ છોકરી માટે પોતાની લાગણી રોકી શકે તેમ નથી, અને ત્યારબાદ તેણે "આઈ લવ યુ" કહીને વિદ્યાર્થીઓને ચોકલેટ વહેંચી હતી.

વિદ્યાર્થિનીનો વિરોધ અને પ્રિન્સિપાલ પાસે જવાનો પડકાર 

આ સાંભળતા જ વિદ્યાર્થિનીએ તરત જ પ્રોફેસરના આ અણછાજતા વર્તન સામે સખત વાંધો ઉઠાવ્યો હતો. તેણે પ્રોફેસરનો સામનો કરતા સવાલ કર્યો કે તેણે વિદ્યાર્થિનીએ ક્યારે પ્રપોઝ કર્યું હતું ? વિદ્યાર્થિનીએ પ્રોફેસરને સ્પષ્ટ કહ્યું કે જો તેઓ આ બાબતે ચર્ચા કરવા માંગતા હોય તો પ્રિન્સિપાલ પાસે ચાલે, અને આખો ક્લાસ પણ સાથે આવશે. બચાવમાં પ્રોફેસરે દાવો કર્યો કે તેની પાસે CCTV ફૂટેજમાં પુરાવા છે. વિદ્યાર્થિનીએ તરત જ ફૂટેજ બતાવવા પડકાર ફેંક્યો, પરંતુ પ્રોફેસરે બીજા દિવસે વાત કરવાનું કહીને છટકવાનો પ્રયાસ કર્યો હતો.

ચંપલથી ફટકાર્યો, વિદ્યાર્થીઓએ કેમ્પસમાં પીછો કર્યો 

પરિસ્થિતિ ત્યારે વધુ વણસી જ્યારે વિદ્યાર્થિનીએ કથિત રીતે પ્રોફેસરને પોતાના ચંપલ વડે માર માર્યો હતો. આ ઘટનાથી અન્ય વિદ્યાર્થીઓ પણ ભારે રોષે ભરાયા હતા. અન્ય રિપોર્ટ્સ મુજબ, વિદ્યાર્થીઓએ કેમ્પસમાં પ્રોફેસરનો પીછો કર્યો હતો અને તેની કાર પાસે તેને ઢોર માર માર્યો હતો. જોકે, વધુ હુમલાના ડરથી પ્રોફેસર ત્યાંથી પોતાનો જીવ બચાવીને ભાગી છૂટવામાં સફળ રહ્યો હતો.

પોલીસ તપાસ શરૂ, અલગ-અલગ સમુદાય હોવાથી મામલો સંવેદનશીલ 

સત્તાવાળાઓએ આ કેસને અત્યંત ગંભીરતાથી લીધો છે, કારણ કે પ્રોફેસર અને વિદ્યાર્થિની બંને અલગ-અલગ સમુદાયમાંથી આવે છે. આ ઘટનાનો વીડિયો સોશિયલ મીડિયા પર વાયરલ થતાં લોકોમાં ચિંતા વધી છે. નેલમંગલા ગ્રામીણ પોલીસે આ મામલે ગુનો નોંધીને કેમ્પસમાં બનેલી ઘટના અને હુમલાખોરોની શોધખોળ તેમજ વધુ તપાસ શરૂ કરી દીધી છે. આગામી સમયમાં કોલેજ પ્રશાસન દ્વારા પણ પ્રોફેસર સામે કડક શિક્ષાત્મક પગલાં લેવામાં આવી શકે છે.