ભરૂચની સબજેલમાં જેલની બેરેકમાં બાથરૂમની દીવાલમાં ચાલાકીપૂર્વક છુપાવેલા 4 મોબાઈલ ફોન મળી આવતા જેલ પ્રશાસનમાં ખળભળાટ મચી ગયો છે. ઝડતી સ્ક્વોડ દ્વારા કરવામાં આવેલા આકસ્મિક ચેકિંગ દરમિયાન આ પ્રતિબંધિત વસ્તુઓ મળી આવી છે.

બાથરૂમની દીવાલમાં મોબાઈલનું 'નેટવર્ક'

ભરૂચ સબજેલના સત્તાવાળાઓ દ્વારા જેલના વિવિધ વિભાગોમાં સુરક્ષાની નિયમિત ચકાસણી કરવામાં આવી રહી હતી. આ દરમિયાન જેલની એક ચોક્કસ બેરેકમાં આવેલ બાથરૂમના ઉપરના ભાગમાં દીવાલની અંદર મોબાઈલ ફોન સંતાડવામાં આવ્યા હોવાની આશંકા થતા સ્ક્વોડની ટીમે જ્યારે આ જગ્યાની તપાસ કરી, ત્યારે ત્યાંથી કુલ 4 મોબાઈલ ફોન મળી આવ્યા હતા. 

33 કેદીઓ શંકાના દાયરામાં

આ ઘટના બાદ જેલ પ્રશાસન દ્વારા તાત્કાલિક અસરથી કડક પૂછપરછ હાથ ધરવામાં આવી છે. જે બેરેકમાંથી મોબાઈલ ફોન મળી આવ્યા છે, તેમાં રહેલા તમામ 33 કેદીઓની સઘન પૂછપરછ શરૂ કરી દેવામાં આવી છે. આ મોબાઈલ જેલની અંદર કોણ લાવ્યું હતું, કોના મેળાપીપણાથી આ શક્ય બન્યું અને તેનો ઉપયોગ કયા પ્રકારની ગુનાહિત પ્રવૃત્તિ માટે કરવામાં આવતો હતો તે દિશામાં તપાસ તેજ કરવામાં આવી છે. 

પોલીસ ફરિયાદ અને સુરક્ષા સામે સવાલ

જેલ પ્રશાસન દ્વારા આ મામલે ભરૂચ શહેર બી ડિવિઝન પોલીસ મથકે વિધિવત રીતે ગુનો નોંધાવવામાં આવ્યો છે. પોલીસ હવે જપ્ત કરાયેલા મોબાઈલ ફોનના સીડીઆર કઢાવીને એ જાણવાનો પ્રયાસ કરશે કે જેલની અંદરથી બહાર કયા લોકો સાથે સંપર્ક કરવામાં આવતો હતો.  હાલમાં જેલ સત્તાવાળાઓ દ્વારા જેલની સુરક્ષામાં વધારો કરી દેવામાં આવ્યો છે અને આગામી દિવસોમાં અન્ય બેરેકોમાં પણ આ પ્રકારનું આકસ્મિક સર્ચ ઓપરેશન ચાલુ રાખવાની જાહેરાત કરવામાં આવી છે.