પવિત્ર રમઝાન માસની પૂર્ણાહુતિ બાદ આજ રોજ 21 માર્ચ, 2026 ના રોજ ભાવનગર જિલ્લા જેલમાં પણ ભારે હર્ષોલ્લાસ અને કોમી એખલાસના વાતાવરણમાં રમઝાન ઈદની ઉજવણી કરવામાં આવી હતી. જેલ પ્રશાસન અને સ્થાનિક સંસ્થાના સહયોગથી આયોજિત આ વિશેષ કાર્યક્રમમાં કેદીઓએ ભેદભાવ ભૂલીને એકબીજાને ઈદની મુબારકબાદી પાઠવી હતી, જે જેલના બંધિયાર વાતાવરણમાં પણ હકારાત્મકતાનું ઉત્તમ ઉદાહરણ પૂરું પાડે છે.

નમાઝ અદા કરાઈ અને ખીર-પુરીનો પ્રસાદ વહેંચાયો 

પ્રાપ્ત વિગતો અનુસાર, સુન્ની દાવતે ઈસ્લામી સંસ્થા, ભાવનગરના વિશેષ સહયોગથી જેલ પરિસરમાં જ મુસ્લિમ બંદીવાનો માટે ઈદની વિશેષ નમાઝ પઢવાની વ્યવસ્થા કરવામાં આવી હતી. નમાઝ પૂર્ણ થયા બાદ તહેવારની ખુશીમાં વધારો કરવા માટે ધર્મના ભેદભાવ વિના જેલના તમામ બંદીવાનોને વિશેષ ભોજન રૂપે ખીર અને પુરીનો પ્રસાદ પીરસવામાં આવ્યો હતો. આ અવસરે જેલના તમામ બંદીવાનોએ ઉત્સાહભેર એકબીજાને ગળે મળીને ઈદની શુભેચ્છાઓની આપ-લે કરી હતી.

જેલ અધિક્ષક દ્વારા બંદીવાનોને પ્રેરણાદાયક શુભેચ્છાઓ 

આ પાવન પ્રસંગે ભાવનગર જિલ્લા જેલના ઈન્ચાર્જ જેલ અધિક્ષક આર. ટી. સોલંકી ખાસ ઉપસ્થિત રહ્યા હતા. તેમણે જેલના તમામ બંદીવાનોને રમઝાન ઈદની હાર્દિક શુભેચ્છાઓ પાઠવી હતી. પોતાના સંબોધનમાં અધિક્ષક સોલંકીએ બંદીવાનોને પ્રોત્સાહિત કરતા જણાવ્યું હતું કે, તેઓ સજા પૂરી કરીને અથવા જેલમાંથી વહેલા મુક્ત થઈને બહાર જાય અને પોતાના પરિવાર સાથે એક શાંતિપૂર્ણ તથા ગુનાહિત પ્રવૃત્તિઓથી દૂર એવું નવું સકારાત્મક જીવન વિતાવે તેવી તેઓ કામના કરે છે.