રોહિત ગોદારા અને ગોલ્ડી બરાડ જેવી ગેંગ્સ હાલ ઉત્તર ભારત માટે સુરક્ષાનો મોટો પડકાર બની છે. વિદેશમાં બેસીને ઓપરેટ થતી આ ગેંગ્સ અત્યંત આધુનિક હથિયારો અને સ્થાનિક શૂટર્સની મદદથી વેપારીઓને નિશાન બનાવી રહી છે. ખંડણી, હત્યા અને ગોળીબાર જેવી પ્રવૃત્તિઓ દ્વારા ભયનું વાતાવરણ ઊભું કરતી આ ટોળકીઓ વિરુદ્ધ હવે સુરક્ષા એજન્સીઓએ સર્જિકલ સ્ટ્રાઈક જેવી કડક કાર્યવાહી શરૂ કરી છે.

દિલ્હી પોલીસના સ્પેશિયલ સેલે આંતરરાજ્ય ગુનાખોરી આચરતી રોહિત ગોદારા અને ગોલ્ડી બરાડ-વીરેન્દ્ર ચરણ ગેંગ વિરુદ્ધ મોટી કાર્યવાહી કરી છે. પોલીસે આ ગેંગના કુખ્યાત શૂટર દીપક ઉર્ફે દિલાવરની ધરપકડ કરી છે. ઉત્તર પ્રદેશના ઉન્નાવના રહેવાસી એવા આ શૂટર પાસેથી પોલીસે લોડેડ સેમી-ઓટોમેટિક પિસ્તોલ અને 05 જીવંત કારતૂસ જપ્ત કર્યા છે.

ખંડણી અને ગોળીબારનો સિલસિલો:

પોલીસ તપાસમાં બહાર આવ્યું છે કે આ ગેંગ દિલ્હી, હરિયાણા, પંજાબ અને રાજસ્થાનમાં સક્રિય છે. ડિસેમ્બર 2025 માં આ ટોળકીના સભ્ય વીરેન્દ્ર ચરણએ દિલ્હીના એક મોટા જ્વેલર પાસેથી 10 કરોડની ખંડણી માંગી હતી. આ કેસની તપાસ દરમિયાન અગાઉ રોહિત, રાહુલ, લક્ષ્મણ, મોહિત અને પંકજ રાજપૂત 05 આરોપીઓ પકડાઈ ચૂક્યા છે, જેમાં પંકજ સામે 20 થી વધુ ગંભીર ગુના નોંધાયેલા છે.

પંજાબમાં ટ્રાવેલ કંપની પર હુમલો:

આરોપી દીપક ઉર્ફે દિલાવર પંજાબના નાકોદરમાં થયેલા ગોળીબારમાં પણ સામેલ હતો. વર્ષ 2025 માં વીરેન્દ્ર ચરણએ બક્ષી ટ્રાવેલ કંપનીના માલિક પાસે 05 કરોડ માંગ્યા હતા. રકમ ન મળતા ગેંગે દબાણ લાવવા માટે 13 January 2026 ના રોજ કંપનીની ઓફિસ પર અંધાધૂંધ ગોળીબાર કર્યો હતો. આ ઘટના બાદ દીપક ફરાર થઈ ગયો હતો.

સૈનિક વિહારમાં દરોડો અને ધરપકડ:

સ્પેશિયલ સેલની ટીમે ટેકનિકલ સર્વેલન્સ અને બાતમીદારોની મદદથી તપાસ તેજ કરી હતી. પોલીસને માહિતી મળી હતી કે શૂટર દીપક દિલ્હીના સૈનિક વિહાર વિસ્તારમાં છુપાયેલો છે. તારીખ 23 March 2026 ના રોજ પોલીસે ઓપરેશન પાર પાડીને તેને દબોચી લીધો હતો.

હાલમાં દિલ્હી પોલીસ આ ગેંગના અન્ય સભ્યો અને ભવિષ્યના ટાર્ગેટ વિશે પૂછપરછ કરી રહી છે. આ ધરપકડથી ગેંગના ખંડણીના નેટવર્કને મોટો ફટકો પડ્યો છે.