અમદાવાદ મ્યુનિસિપલ કોર્પોરેશન (AMC)ની આગામી ચૂંટણીનો જંગ હવે ચરમસીમાએ પહોંચ્યો છે, કારણ કે આજે ઉમેદવારી ફોર્મ ભરવાનો અંતિમ દિવસ હોવાથી તમામ રાજકીય પક્ષોમાં ભારે દોડધામ જોવા મળી રહી છે. શહેરના હાઈપ્રોફાઈલ ગણાતા બોડકદેવ વોર્ડમાં ભારતીય જનતા પાર્ટીએ પોતાના ગઢને જાળવી રાખવા માટે વ્યૂહાત્મક દાવ ખેલ્યો છે. આજે ફોર્મ ભરવાના અંતિમ દિવસે ભાજપના દિગ્ગજ ઉમેદવાર દેવાંગ દાણી અને તેમની સાથે મેદાનમાં ઉતરેલા ધરમશી દેસાઈએ શક્તિ પ્રદર્શન સાથે પોતાની ઉમેદવારી નોંધાવી હતી. ફોર્મ ભરવાની પ્રક્રિયા શરૂ કરતા પહેલા બંને ઉમેદવારો વસ્ત્રાપુર ખાતે આવેલા સુપ્રસિદ્ધ ગણપતિ મંદિરે પહોંચ્યા હતા, જ્યાં તેમણે ભગવાન ગણેશની શાસ્ત્રોક્ત વિધિ મુજબ પૂજા-અર્ચના કરી વિજયી ભવના આશીર્વાદ મેળવ્યા હતા. ભક્તિમય વાતાવરણ વચ્ચે કાર્યકરોમાં ભારે ઉત્સાહ જોવા મળ્યો હતો અને 'ભારત માતા કી જય' ના નારાથી સમગ્ર વિસ્તાર ગાજી ઉઠ્યો હતો.

પક્ષ દ્વારા દેવાંગ દાણી પર ફરી એકવાર વિશ્વાસ વ્યક્ત કરીને તેમને રિપીટ કરવામાં આવ્યા છે, જે તેમની મજબૂત પકડ અને લોકપ્રિયતાનો પુરાવો આપે છે. ગત ટર્મ દરમિયાન વોર્ડના વિકાસ કાર્યોમાં આપેલી સક્રિય ફાળવણી અને સંગઠન સાથેના સુમેળભર્યા સંબંધોને કારણે હાઈકમાન્ડ દ્વારા તેમને ફરીથી તક આપવામાં આવી છે. 

દેવાંગ દાણીએ જણાવ્યું હતું કે, "પક્ષે મારા પર મૂકેલો ભરોસો એ મારા એકલાનો નહીં પણ કાર્યકરોની મહેનતનો વિજય છે. અમે બોડકદેવના વિકાસ માટે પ્રતિબદ્ધ છીએ અને જંગી બહુમતીથી જીતીને ભાજપનો પરચમ લહેરાવીશું." બીજી તરફ, ઉમેદવાર ધરમશી દેસાઈએ પણ પોતાની જીત અંગે મક્કમ આત્મવિશ્વાસ વ્યક્ત કર્યો હતો. 

બોડકદેવ વોર્ડની જનતા વિકાસની રાજનીતિમાં માને છે અને તેઓ ફરી એકવાર ભાજપના કમળને જ પસંદ કરશે તેવો અમને પૂર્ણ વિશ્વાસ છે. ફોર્મ ભરવા જતી વખતે મોટી સંખ્યામાં ઉમટી પડેલા સમર્થકોને જોઈને એવું જણાઈ રહ્યું હતું કે બોડકદેવમાં ભાજપની રણનીતિ અસરકારક સાબિત થઈ રહી છે. હવે આગામી દિવસોમાં પ્રચાર પ્રસાર વધુ તેજ બનશે અને જોવાનું એ રહેશે કે વિપક્ષ આ ગઢમાં કેવી રીતે સેંધ મારે છે.