અમદાવાદના વિકસિત ગણાતા ચાંદખેડા વિસ્તારમાં ફરી એકવાર તસ્કર ટોળકીએ માથું ઊંચકતા સ્થાનિક રહીશોની ઊંઘ હરામ થઈ ગઈ છે. છેલ્લા કેટલાક સમયથી શાંત ગણાતા આ વિસ્તારમાં રાત્રિના સમયે કુખ્યાત 'ચડ્ડી-બનિયાનધારી' ટોળકી ત્રાટકી હોવાના અહેવાલોએ સમગ્ર પંથકમાં ભયનો માહોલ પેદા કર્યો છે. ચાંદખેડાના જાણીતા શ્યામ સારથી બંગલોઝમાં મોડી રાત્રે તસ્કરોનો આ જમાવડો જોવા મળ્યો હતો, જ્યાં સુરક્ષા વ્યવસ્થાને પડકાર ફેંકી આ ટોળકી બિન્દાસ રીતે સોસાયટીના પરિસરમાં ઘૂસી હતી. આ ટોળકીના સભ્યો હાથમાં ચંપલ લઈને ધીમે ધીમે પગે ચાલતાં નજરે પડ્યાં હતાં, જે દર્શાવે છે કે તેઓ કોઈ મોટી ચોરી કે લૂંટના ઈરાદે જ આવ્યાં હશે.

આ ઘટનાની સૌથી ચિંતાજનક બાબત એ છે કે, આ આખીય ટોળકી સોસાયટીના CCTV કેમેરામાં સ્પષ્ટપણે કેદ થઈ ગઈ છે. ફૂટેજમાં જોઈ શકાય છે કે આશરે ચાર જેટલા શખ્સો, જેઓએ માત્ર અંતરવસ્ત્રો ધારણ કરેલા છે અને મોઢે રૂમાલ બાંધેલા છે, તેઓ એક ઘરથી બીજા ઘરની રેકી કરી રહ્યા હતા. અત્યંત પ્રોફેશનલ રીતે અને દબાતા પગલે હિલચાલ કરી રહેલી આ ટોળકીના સભ્યોએ સોસાયટીમાં લાંબો સમય વિતાવ્યો હોવાનું પણ સામે આવ્યું છે. જ્યારે રહીશોએ CCTV તપાસ્યા ત્યારે આ દ્રશ્યો જોઈને તેમના હોશ ઉડી ગયા હતા. ખાસ કરીને વહેલી સવારે વોકિંગ માટે નીકળતા વૃદ્ધો અને એકલા રહેતા પરિવારોમાં આ ઘટનાને પગલે ભારે ફફડાટ વ્યાપી ગયો છે.

શ્યામ સારથી બંગલોઝ જેવી સુરક્ષિત સોસાયટીમાં જો આ રીતે ખુલ્લેઆમ તસ્કરો ઘૂસી શકતા હોય, તો સામાન્ય નાગરિકોની સુરક્ષાનું શું?  ચાંદખેડામાં આ પ્રકારે ચડ્ડી-બનિયાનધારી ગેંગ સક્રિય થતા હવે રાત્રિ પોલીસ પેટ્રોલિંગ વધારવાની માંગ પણ ઉઠી છે. જ્યાં સુધી આ ટોળકી પકડાય નહીં ત્યાં સુધી સ્થાનિકોના માથે ડરની તલવાર લટકતી રહેશે.