ભારતીય સંસ્કૃતિમાં હિમાલયની ગોદમાં આવેલા ચારધામ - બદ્રીનાથ, કેદારનાથ, ગંગોત્રી અને યમુનોત્રીનું અનન્ય આધ્યાત્મિક મહત્વ છે. આ યાત્રા માત્ર શારીરિક ભ્રમણ નથી, પરંતુ આત્માની શુદ્ધિ અને મોક્ષ પ્રાપ્તિનો માર્ગ માનવામાં આવે છે. દર વર્ષે લાખો શ્રદ્ધાળુઓ પ્રકૃતિના અદભૂત સૌંદર્ય વચ્ચે શ્રદ્ધા અને અતૂટ વિશ્વાસ સાથે આ પવિત્ર ધામોના દર્શનાર્થે ઉમટી પડે છે.

ઉત્તરાખંડની પવિત્ર ચારધામ યાત્રાને લઈને શ્રદ્ધાળુઓમાં ભારે ઉત્સાહ જોવા મળી રહ્યો છે. વર્ષ 2026 ની આ યાત્રા માટે રજિસ્ટ્રેશન પ્રક્રિયા શરૂ થયાના ટૂંકા ગાળામાં જ અત્યાર સુધીમાં 10 લાખથી વધુ ભક્તોએ પોતાનું નામ નોંધાવ્યું છે. આગામી 19 એપ્રિલથી ગંગોત્રી અને યમુનોત્રી ધામના દ્વાર ખુલવાની સાથે જ આ યાત્રાનો વિધિવત પ્રારંભ થશે.

કયા ધામના દ્વાર ક્યારે ખુલ્યા ?

યાત્રાના શિડ્યુલ મુજબ ચારેય પવિત્ર ધામોના કપાટ ખુલવાની તારીખો નીચે મુજબ છે:

ગંગોત્રી અને યમુનોત્રી ધામ: 19 એપ્રિલ, 2026

કેદારનાથ ધામ: 22 એપ્રિલ, 2026

બદ્રીનાથ ધામ: 23 એપ્રિલ, 2026

સરકારની સજ્જતા અને સલામત યાત્રાનો સંકલ્પ

ઉત્તરાખંડના મુખ્યમંત્રી પુષ્કર સિંહ ધામીએ જણાવ્યું છે કે, દેશ-વિદેશથી આવતા તમામ યાત્રાળુઓની સુરક્ષા અને સુવિધા એ સરકારની પ્રાથમિકતા છે. આ વખતે ખાસ કરીને કુદરતી આપત્તિઓ અને હવામાનની આગાહીઓ અંગે શ્રદ્ધાળુઓને સમયસર અપડેટ આપવામાં આવશે. સીએમ ધામી પોતે યાત્રા શરૂ થાય તે પહેલા માર્ગોનું નિરીક્ષણ કરી વ્યવસ્થાઓની સમીક્ષા કરશે.

રજિસ્ટ્રેશન પ્રક્રિયા અને મહત્વની માહિતી

શ્રદ્ધાળુઓ માટે રજિસ્ટ્રેશન પ્રક્રિયા 6 માર્ચ, 2026 થી ખુલ્લી મૂકવામાં આવી છે.

નોંધણી માટેના માધ્યમો: સત્તાવાર વેબસાઇટ registrationandtouristcare.uk.gov.in અથવા 'Tourist Care Uttarakhand' મોબાઈલ એપ્લિકેશન.

છેલ્લી તારીખ: રજિસ્ટ્રેશન માટે હાલ કોઈ અંતિમ તારીખ જાહેર કરાઈ નથી, પરંતુ સ્લોટની મર્યાદાને ધ્યાનમાં રાખી વહેલા રજિસ્ટ્રેશન કરાવવાની સલાહ આપવામાં આવી છે.

યાત્રીઓની સંખ્યા: સામાન્ય સંજોગોમાં શ્રદ્ધાળુઓની સંખ્યા પર હાલમાં કોઈ મર્યાદા લાદવામાં આવી નથી.

આ વર્ષે વિક્રમી સંખ્યામાં પ્રવાસીઓ ઉમટી પડવાની સંભાવના હોવાથી સ્થાનિક પ્રશાસન દ્વારા રહેવા, જમવા અને આરોગ્યની સુવિધાઓને વધુ સુદ્રઢ બનાવવામાં આવી રહી છે.