અમદાવાદના નરોડા પાટિયા ખાતે મુખ્યમંત્રી ભૂપેન્દ્ર પટેલે સિંધી સમાજના પવિત્ર તહેવાર ચેટીચંડ નિમિત્તે આયોજિત વિશેષ કાર્યક્રમમાં હાજરી આપી હતી. આ પાવન અવસરે તેમણે સિંધી સમાજના ભાઈઓ-બહેનોને શુભેચ્છાઓ પાઠવવાની સાથે ભગવાન ઝૂલેલાલની ભવ્ય શોભાયાત્રાનું વિધિવત પ્રસ્થાન કરાવ્યું હતું. આ કાર્યક્રમ અમદાવાદ મ્યુનિસિપલ કોર્પોરેશન અને ચેટીચંડ મહોત્સવ સમિતિના સંયુક્ત ઉપક્રમે યોજવામાં આવ્યો હતો.

સિંધી સમાજ ગુજરાતની સંસ્કૃતિમાં દૂધમાં સાકરની જેમ ભળી ગયો છે: મુખ્યમંત્રી 

શોભાયાત્રા પૂર્વે જનમેદનીને સંબોધન કરતા મુખ્યમંત્રી ભૂપેન્દ્ર પટેલે જણાવ્યું હતું કે, ચેટીચંડ એ દરિયાદેવની આરાધનાનો પવિત્ર તહેવાર છે, અને યોગાનુયોગ આ સાથે ચૈત્રી નવરાત્રીનો પાવન અવસર પણ ચાલી રહ્યો છે. સિંધી સમાજની પ્રશંસા કરતા તેમણે કહ્યું કે, સાહસ, પરિશ્રમ અને પુરુષાર્થ થકી આ સમાજે વેપાર-વાણિજ્યમાં પોતાની આગવી ઓળખ ઊભી કરી છે. સિંધમાંથી આવીને ગુજરાતને કર્મભૂમિ બનાવનાર સિંધી સમાજે પોતાની ભાષા અને સંસ્કૃતિ જાળવી રાખી છે, અને તેઓ રાજ્યના વિકાસમાં દૂધમાં સાકરની જેમ ભળી ગયા છે. મુખ્યમંત્રીએ ઉમેર્યું કે, સમાજની આ ભાવના “એક ભારત, શ્રેષ્ઠ ભારત”ના મંત્રને સાર્થક કરે છે.

પર્યાવરણ લક્ષી અને સ્વચ્છતા અભિયાનોમાં જોડાવા અપીલ 

નવી પેઢી પોતાની વિરાસત અને પરંપરાથી વાકેફ થાય તે માટે આવા ધાર્મિક અને સામૂહિક આયોજનોને મુખ્યમંત્રીએ અત્યંત મહત્વપૂર્ણ ગણાવ્યા હતા. વધુમાં, તેમણે સિંધી સમાજને પ્રધાનમંત્રી નરેન્દ્ર મોદી દ્વારા શરૂ કરવામાં આવેલા “કેચ ધ રેઈન”, “એક પેડ મા કે નામ” અને “સ્વચ્છ ભારત” જેવા રાષ્ટ્રવ્યાપી અભિયાનોમાં સક્રિયપણે સહભાગી થવા ખાસ અનુરોધ કર્યો હતો.

દેશના વિકાસમાં સિંધી સમાજનું યોગદાન અનોખું: ડૉ. પાયલ કુકરાની 

કાર્યક્રમની શરૂઆતમાં સ્થાનિક ધારાસભ્ય ડૉ. પાયલબેન કુકરાનીએ સ્વાગત પ્રવચન કર્યું હતું. તેમણે જણાવ્યું હતું કે, ધર્મ અને સંસ્કૃતિના રક્ષણ માટે સિંધી સમાજે પોતાનું વતન સિંધ છોડીને ભારતને પોતાનું ઘર બનાવ્યું છે. આજે દેશના સર્વાંગી વિકાસમાં સિંધી સમાજનું યોગદાન અત્યંત નોંધપાત્ર રહ્યું છે.

રાજકીય અને સામાજિક અગ્રણીઓની વિશેષ ઉપસ્થિતિ 

આ ધાર્મિક મહોત્સવમાં શહેરી વિકાસ રાજ્ય મંત્રી દર્શનાબેન વાઘેલા, શિક્ષણ રાજ્ય મંત્રી રિવાબા જાડેજા, સાંસદ દિનેશભાઇ મકવાણા અને હસમુખભાઈ પટેલ, ધારાસભ્ય કંચનબેન રાદડિયા, પૂર્વ મંત્રી માયાબેન કોડનાણી અને પૂર્વ ધારાસભ્ય નિર્મલાબેન વાધવાની ખાસ ઉપસ્થિત રહ્યા હતા. આ ઉપરાંત સિંધી સમાજના સંતો-મહંતો અને મોટી સંખ્યામાં ભાઈ-બહેનોએ કાર્યક્રમમાં હાજરી આપી હતી. આગામી સમયમાં આવા આયોજનો થકી સમાજમાં સંગઠન અને રાષ્ટ્રપ્રેમની ભાવના વધુ મજબૂત બનશે તેવી અપેક્ષા છે.