પશ્ચિમ એશિયામાં ચાલી રહેલા સંઘર્ષની અસર હવે સીધી ભારતીય બજારો પર જોવા મળી રહી છે. ઓઇલ માર્કેટિંગ કંપનીઓએ દેશના મહાનગરોમાં 19 કિલોગ્રામના કોમર્શિયલ LPG ગેસ સિલિન્ડરના ભાવમાં 195.50 રૂપિયાનો મોટો વધારો કર્યો છે. સુધારેલી આ નવી કિંમતો આજથી જ અમલમાં આવી ગઈ છે, જેના કારણે હોટલ અને રેસ્ટોરન્ટના સંચાલકોને મોટો ફટકો પડ્યો છે.

દિલ્હીમાં સિલિન્ડરનો ભાવ 2000 ની પાર 

ઇન્ડિયન ઓઇલ કોર્પોરેશન લિમિટેડની સત્તાવાર વેબસાઇટ પર ઉપલબ્ધ આંકડાઓ અનુસાર, રાજધાની દિલ્હીમાં કોમર્શિયલ એલપીજી ગેસ સિલિન્ડરનો છૂટક ભાવ હવે વધીને 2078.50 રૂપિયા થઈ ગયો છે. પશ્ચિમ એશિયાના ભૌગોલિક અને રાજકીય તણાવ વચ્ચે ઇંધણ કંપનીઓએ આ મોટો ભાવવધારો લાગુ કર્યો છે.

મુંબઈ, કોલકાતા અને ચેન્નાઈમાં નવા દરો લાગુ 

દિલ્હી ઉપરાંત દેશના અન્ય મહાનગરોમાં પણ ભાવવધારો લાગુ કરી દેવામાં આવ્યો છે. ઓઇલ કંપનીઓ દ્વારા જાહેર કરાયેલા નવા રેટ મુજબ, કોલકાતામાં કોમર્શિયલ LPG ની કિંમત હવે 2208 રૂપિયા પર પહોંચી ગઈ છે. આર્થિક રાજધાની મુંબઈમાં વેપારીઓએ એક સિલિન્ડર માટે 2031 રૂપિયા ચૂકવવા પડશે. બીજી તરફ, ચેન્નાઈમાં આ કિંમત સૌથી વધુ એટલે કે 2246.50 રૂપિયા નિર્ધારિત કરવામાં આવી છે. 19 કિલોગ્રામના કોમર્શિયલ સિલિન્ડરની આ સુધારેલી કિંમતો આજથી દેશભરમાં પ્રભાવી બની છે.

ઘરેલુ ગેસ વપરાશકારો માટે મોટી રાહત 

પશ્ચિમ એશિયાના સંઘર્ષના કારણે આંતરરાષ્ટ્રીય સ્તરે ઇંધણના ભાવમાં ભારે અનિશ્ચિતતા પ્રવર્તી રહી છે. આમ છતાં, સામાન્ય જનતાને મોંઘવારીનો સીધો માર ન પડે તે માટે એક મહત્વપૂર્ણ નિર્ણય લેવામાં આવ્યો છે. દેશમાં ઘરેલુ વપરાશના LPG સિલિન્ડરના ભાવમાં કોઈ જ ફેરફાર કરવામાં આવ્યો નથી અને તેના ભાવ યથાવત રાખવામાં આવ્યા છે. ઘરેલુ ગેસના ભાવ સ્થિર રહેવાથી સામાન્ય પરિવારોને મોટી રાહત મળી છે.