ગાંધીનગર નજીક આવેલા સુપ્રસિદ્ધ અને પૌરાણિક શ્રી ડભોડિયા હનુમાનજી મંદિરે આગામી ચૈત્રી પૂનમ એટલે કે હનુમાન જયંતીના પાવન પર્વની ખૂબ જ ધામધૂમથી ઉજવણી કરવામાં આવશે. આ ઐતિહાસિક મંદિરે દર્શનાર્થીઓનું ઘોડાપૂર ઉમટી પડશે, જેને ધ્યાનમાં રાખીને મંદિર ટ્રસ્ટ દ્વારા ભક્તો માટે દર્શન, પ્રસાદ અને વાહનવ્યવહારની વિશેષ વ્યવસ્થા ઊભી કરવામાં આવી છે.

1000 વર્ષ જૂનું સ્વયંભૂ મંદિર અને તેલના અભિષેકની પરંપરા 

ડભોડામાં આવેલું શ્રી હનુમાનજીનું આ મંદિર આશરે 1000 વર્ષ જૂનું અને સ્વયંભૂ હોવાની માન્યતા છે. આ મંદિરે ભક્તો પોતાની મનોકામના અને બાધા પૂરી કરવા માટે દાદાને શ્રદ્ધાપૂર્વક તેલનો અભિષેક કરે છે. મંદિરના ટ્રસ્ટીઓ હસમુખ પટેલ અને અરવિંદસિંહ પરમારના જણાવ્યા અનુસાર, આ વર્ષે પણ હનુમાન જયંતીના પવિત્ર અવસરે દાદાને 2500 થી વધુ તેલના ડબ્બાનો અભિષેક કરવામાં આવશે, જે ભક્તોની દાદા પ્રત્યેની અપાર શ્રદ્ધાનું પ્રતીક છે.

ભવ્ય શોભાયાત્રા, 12 વાગ્યે મહાઆરતી અને 151 કિલોની કેક કપાશે 

ચૈત્રી પૂનમના દિવસે સવારે ગામમાં એક ભવ્ય શોભાયાત્રાનું આયોજન કરવામાં આવ્યું છે. આ શોભાયાત્રા ડભોડા ગામના તમામ મુખ્ય રોડ પર ફરશે અને સમગ્ર વિસ્તારને ભક્તિમય બનાવશે. બપોરે બરાબર 12 વાગ્યે હનુમાનજી દાદાની મહાઆરતી કરવામાં આવશે. આ વખતના જન્મોત્સવનું વિશેષ આકર્ષણ 151 કિલોની જંગી કેક રહેશે, જેને કાપીને હનુમાન જયંતી હર્ષોલ્લાસ સાથે મનાવવામાં આવશે.

દર્શનાર્થીઓ માટે સુદ્રઢ વ્યવસ્થા: ભોજન, પાર્કિંગ અને 50 ઓટો રિક્ષા 

હનુમાન જયંતી નિમિત્તે ઉમટી પડનારા હજારો શ્રદ્ધાળુઓની સુવિધા માટે મંદિર પ્રશાસન દ્વારા ખાસ તકેદારી રાખવામાં આવી છે. દૂર-દૂરથી આવતા તમામ દર્શનાર્થીઓ માટે ભોજન પ્રસાદની ઉત્તમ વ્યવસ્થા ગોઠવવામાં આવી છે. ટ્રાફિકની સમસ્યા ન સર્જાય તે માટે ગામની અંદર જ વ્યવસ્થિત પાર્કિંગ પોઇન્ટ ઊભા કરવામાં આવ્યા છે. વધુમાં, પાર્કિંગથી મંદિર સુધી પહોંચવા માટે ભક્તોની સગવડતા અર્થે 50 જેટલી ઓટો રિક્ષાઓ પણ કાર્યરત કરવામાં આવી છે, જેથી વૃદ્ધો અને બાળકોને ચાલવામાં કોઈ મુશ્કેલી ન પડે.