અમદાવાદ જિલ્લાના ધોળકા તાલુકાના ઈંગોલી ગામમાં રવિવારની શાંત સાંજ અચાનક ગોળીબારના અવાજથી ગુંજી ઉઠી હતી. રમત-ગમતના મેદાનમાં સામાન્ય ગણાતી બાબતે બે જૂથો વચ્ચે ખેલાયેલા હિંસક જંગમાં આખરે પોલીસે કડક કાર્યવાહી કરીને ફરાર આઠેય શખ્સોને દબોચી લીધા છે. આ ઘટનાની વિગત એવી છે કે ગામના બસ સ્ટેન્ડ નજીક અલ્ફેજખાન પઠાણ અને અન્ય યુવકો ક્રિકેટની રમતનો આનંદ માણી રહ્યા હતા, ત્યારે અચાનક મેદાનમાં રહેલા અલબક્ષખાન પઠાણને ક્રિકેટનો દડો વાગતા મામલો ગરમાયો હતો. સામાન્ય બોલાચાલીએ જોતજોતામાં હિંસક સ્વરૂપ ધારણ કરી લીધું હતું અને ઉશ્કેરાયેલા આરોપીએ રમતનું બેટ ઝૂંટવી અલ્ફેજખાનના માથામાં ઝીંકી દઈ ઇજાગ્રસ્ત કરી નાખ્યો હતો.

જોકે, વિવાદ અહીં શમવાને બદલે વધુ વકર્યો હતો. મારામારીના સમાચાર વાયુવેગે પ્રસરતા અન્ય સાગરીતો પણ લાકડીઓ, બેટ અને જીવલેણ હથિયારો સાથે મેદાનમાં ધસી આવ્યા હતા. આ જૂથ અથડામણ દરમિયાન વાહીદખાન મજીદખાન પઠાણે પોતાની પાસે રહેલી રિવોલ્વર કાઢી ફરિયાદી મયુદ્દીનખાન પઠાણ પર નિશાન સાધી સીધું ફાયરિંગ કરવાનો પ્રયાસ કર્યો હતો. સદનસીબે, ત્યાં હાજર સરોજખાન પઠાણે અત્યંત બહાદુરી અને સમયસૂચકતા વાપરી આરોપીનો હાથ હવામાં ઊંચો કરી દેતા ગોળી હવામાં ચાલી ગઈ હતી. આ એક ક્ષણની સતર્કતાએ મોટી જાનહાનિ ટાળી હતી, પરંતુ ગામમાં ભારે અફરાતફરી અને ભયનો માહોલ ફેલાઈ ગયો હતો. 

ઘટનાને પગલે સ્થાનિકોમાં ફફડાટ વ્યાપી ગયો હતો અને ગામની સ્થિતિ તંગ બની ગઈ હતી. પોલીસ ફરિયાદ નોંધાયા બાદ મુખ્ય આરોપી વાહીદખાન સહિતના શખ્સો ફરાર થઈ ગયા હતા, જેમને પકડવા પોલીસે ચક્રો ગતિમાન કર્યા હતા. ધોળકા રૂરલ પોલીસે આ મામલે સઘન તપાસ હાથ ધરી અંતે આઠેય આરોપીઓ- અલબક્ષખાન, અરબજખાન, મોઇજખાન, મજીદખાન, નબીખાન, ઈમદાદખાન, નજીરખાન અને ફાયરિંગ કરનાર વાહીદખાન પઠાણને ઝડપી પાડ્યા છે. પકડાયેલા તમામ આરોપીઓ સામે રાયોટિંગ અને આર્મ્સ એક્ટ હેઠળ ગુનો નોંધીને પોલીસે કાયદેસરની કાર્યવાહી હાથ ધરી છે, જેથી વિસ્તારમાં ફરી શાંતિ સ્થપાય અને કાયદો-વ્યવસ્થા જળવાઈ રહે.