અમેરિકાના રાષ્ટ્રપતિ ડોનાલ્ડ ટ્રમ્પે સત્તાવાર રીતે જાહેરાત કરી છે કે ઈરાન સામે ચાલી રહેલું યુદ્ધ આગામી 2 થી 3 અઠવાડિયામાં પૂર્ણ થઈ જશે. અમેરિકન સૈન્યનું 'ઓપરેશન એપિક ફ્યુરી' હવે તેના અંતિમ તબક્કામાં છે. ટ્રમ્પે સ્પષ્ટ કર્યું છે કે ઈરાનની પરમાણુ ક્ષમતાઓને કાયમ માટે નષ્ટ કર્યા બાદ જ અમેરિકા આ પ્રદેશમાંથી બહાર નીકળશે.

ઈરાનની લશ્કરી તાકાત ખતમ કરવાનો અમેરિકાનો દાવો 

પ્રેસ સાથેની વાતચીતમાં રાષ્ટ્રપતિ ટ્રમ્પે જણાવ્યું હતું કે અમેરિકા મધ્ય પૂર્વનો આ પ્રદેશ છોડતા પહેલા ઈરાન પાસે રહેલી દરેક સૈન્ય તાકાત અને વસ્તુને ખતમ કરવા માંગે છે. જોકે, તેમણે યુદ્ધ સમાપ્ત કરતા પહેલા બંને દેશો વચ્ચે કોઈ સંભવિત કરાર થવાના પણ સંકેત આપ્યા છે. આ મામલે યુએસ સેક્રેટરી ઓફ સ્ટેટ માર્કો રુબિયોએ કહ્યું હતું કે, પહેલા દિવસથી જ અમેરિકાનું મિશન સ્પષ્ટ હતું કે ઈરાનના ખતરાને કાયમ માટે ભૂંસી નાખવાની આ છેલ્લી અને શ્રેષ્ઠ તક છે, જેથી તેઓ ભવિષ્યમાં ક્યારેય પરમાણુ હથિયાર ન બનાવી શકે.

સાથી દેશોના વલણથી ટ્રમ્પ નિરાશ, વધુ જવાબદારી લેવા અપીલ 

એક ન્યૂઝ ચેનલને આપેલા ઇન્ટરવ્યુમાં રાષ્ટ્રપતિ ટ્રમ્પે આંતરરાષ્ટ્રીય સાથી દેશો, ખાસ કરીને યુનાઇટેડ કિંગડમ તરફથી પૂરતું લશ્કરી સમર્થન ન મળવા અંગે ભારે નિરાશા વ્યક્ત કરી હતી. ઈરાન સાથે ચાલી રહેલા યુએસ-ઇઝરાયલ સંઘર્ષમાં તેમણે અન્ય દેશોને મહત્વપૂર્ણ શિપિંગ રૂટ, હોર્મુઝ સ્ટ્રેટના રક્ષણ માટે આગળ આવવાની અપીલ કરી છે. ટ્રમ્પે દલીલ કરી હતી કે જે દેશો આ પ્રદેશમાંથી તેલની આયાત પર નિર્ભર છે, તેમણે આ જળમાર્ગોને સુરક્ષિત રાખવામાં વધુ સક્રિય ભૂમિકા ભજવવી જોઈએ.

હોર્મુઝ સ્ટ્રેટમાં અમેરિકન સૈન્યની તૈનાતી ચાલુ રહેશે 

શિપિંગ અને પ્રાદેશિક માળખાગત સુવિધાઓ પર સતત ઈરાની હુમલાઓ થવા છતાં, ટ્રમ્પે દાવો કર્યો હતો કે હોર્મુઝ સ્ટ્રેટમાં કોઈ વાસ્તવિક ખતરો નથી. તેમણે સ્પષ્ટ કર્યું કે વધતા તણાવ વચ્ચે પણ અમેરિકા આ મહત્વપૂર્ણ જળમાર્ગને સુરક્ષિત કરવાના પ્રયાસોમાંથી પોતાના લશ્કરી દળોને પાછા ખેંચવા તૈયાર નથી. ઉલ્લેખનીય છે કે, હોર્મુઝ સ્ટ્રેટ વિશ્વના સૌથી મહત્વપૂર્ણ તેલ માર્ગોમાંનો એક છે, જ્યાંથી વૈશ્વિક ઓઇલ સપ્લાયનો લગભગ 20 ટકા હિસ્સો પસાર થાય છે.