અમેરિકન રાષ્ટ્રપતિ ડોનાલ્ડ ટ્રમ્પે સોમવારે એક મોટી જાહેરાત કરતા જણાવ્યું છે કે, ઈરાન સાથે થયેલી સકારાત્મક વાતચીત બાદ તેમણે ઈરાનના પાવર પ્લાન્ટ અને ઊર્જા માળખા પરના પ્રસ્તાવિત લશ્કરી હુમલાઓને 5 દિવસ માટે ટાળી દીધા છે. અગાઉ, ટ્રમ્પે 48 કલાકમાં હોર્મુઝ સ્ટ્રેટ ન ખોલવા પર વિનાશક હુમલાની ચીમકી આપી હતી. અમેરિકાના આ નવા નિર્ણયથી પશ્ચિમ એશિયામાં યુદ્ધના વાદળો હાલ પૂરતા વિખેરાયા છે અને શાંતિની આશા જાગી છે.

હકારાત્મક વાતચીતના આધારે લેવાયો નિર્ણય 

રાષ્ટ્રપતિ ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર લખ્યું હતું કે, મને જણાવતા આનંદ થાય છે કે છેલ્લા 2 દિવસમાં અમેરિકા અને ઈરાન વચ્ચે મધ્ય પૂર્વમાં દુશ્મનાવટના સંપૂર્ણ નિરાકરણ અંગે ખૂબ જ સારી અને ઉત્પાદક વાતચીત થઈ છે. આ મંત્રણાના સકારાત્મક સૂર અને મહત્વને ધ્યાનમાં રાખીને તેમણે સંરક્ષણ વિભાગને ઈરાન પરના આયોજિત હવાઈ હુમલા 5 દિવસ માટે રોકવાનો નિર્દેશ આપ્યો છે. જોકે, તેમણે સ્પષ્ટ કર્યું હતું કે હુમલા મુલતવી રાખવાનો આ નિર્ણય ચાલી રહેલી બેઠકોની સફળતા પર આધારિત રહેશે.

48 કલાકનું અલ્ટીમેટમ અને લશ્કરી ઉદ્દેશ્યો 

નોંધનીય છે કે, શનિવારે ટ્રમ્પે કડક ચેતવણી આપતા કહ્યું હતું કે જો ઈરાન 48 કલાકની અંદર હોર્મુઝ સ્ટ્રેટને સંપૂર્ણપણે નહીં ખોલે, તો અમેરિકા ઈરાનના સૌથી મોટા પાવર પ્લાન્ટથી શરૂઆત કરીને વિવિધ ઊર્જા મથકોનો નાશ કરશે. તેમ છતાં, ટ્રમ્પે હવે સંકેત આપ્યો છે કે અમેરિકા મધ્ય પૂર્વમાં તેના લશ્કરી ઉદ્દેશ્યો પૂરા કરવાની નજીક પહોંચી ગયું છે અને અમેરિકન લશ્કરી કાર્યવાહી ટૂંક સમયમાં સમાપ્ત થઈ શકે છે.

અમેરિકાના 5 મુખ્ય લક્ષ્યાંકો અને ઈરાનની વર્તમાન સ્થિતિ 

પોતાની લશ્કરી ઝુંબેશના 5 મુખ્ય લક્ષ્યાંકો વર્ણવતા ટ્રમ્પે જણાવ્યું હતું કે, તેમાં ઈરાનની મિસાઇલ ક્ષમતા ઘટાડવી, સંરક્ષણ ઔદ્યોગિક આધારનો નાશ કરવો અને તેમની નૌકાદળ તથા વાયુસેનાને ખતમ કરવાનો સમાવેશ થાય છે. આ રણનીતિનું કેન્દ્રબિંદુ ઈરાનને કોઈપણ સંજોગોમાં પરમાણુ ક્ષમતા પ્રાપ્ત કરતા અટકાવવાનું છે. ટ્રમ્પે દાવો કર્યો હતો કે, "અમેરિકાએ ઈરાનને નકશા પરથી ઉડાવી દીધું છે... તેમનું નેતૃત્વ, નૌકાદળ અને વાયુસેના ખતમ થઈ ગયા છે, અને તેઓ કોઈ સંરક્ષણ વિના હવે સોદો કરવા માંગે છે." તેમણે એમ પણ કહ્યું કે અમેરિકાએ નિર્ધારિત સમય કરતા અઠવાડિયા પહેલા જ પોતાના ઉદ્દેશ્યો પૂર્ણ કરી લીધા છે.

સાથી દેશોની સુરક્ષા અને હોર્મુઝ સ્ટ્રેટની જવાબદારી 

અમેરિકા ઇઝરાયલ, સાઉદી અરેબિયા, કતાર અને યુએઈ સહિતના મધ્ય પૂર્વીય સાથી દેશોના ઉચ્ચતમ સ્તરે રક્ષણ માટે પ્રતિબદ્ધ હોવાનું જણાવતા ટ્રમ્પે એક મહત્વની સ્પષ્ટતા પણ કરી હતી. તેમણે કહ્યું કે, હોર્મુઝ સ્ટ્રેટની સુરક્ષા અને પોલીસિંગની જવાબદારી તેનો ઉપયોગ કરતા અન્ય દેશોએ ઉપાડવી પડશે, અમેરિકા તે નહીં કરે. જોકે, જરૂર પડ્યે અને માંગણી કરાશે તો અમેરિકા મદદ માટે તૈયાર રહેશે.