ડિરેક્ટોરેટ ઓફ રેવન્યુ ઈન્ટેલિજન્સ દ્વારા નવી મુંબઈના ન્હાવા શેવા બંદર ખાતે એક મોટી અને અત્યંત મહત્વની કાર્યવાહી કરવામાં આવી છે. દેશની આંતરિક સુરક્ષા માટે ખતરો બની શકે તેવા પ્રતિબંધિત ઇલેક્ટ્રોનિક ઉપકરણોના વિશાળ જથ્થાને સીઝ કરવામાં આવ્યો છે. આ સમગ્ર કૌભાંડમાં ચીનથી આયાત કરાયેલા માલસામાનમાં મોટી ગેરરીતિઓ આચરવામાં આવી હોવાનું તપાસમાં બહાર આવ્યું છે. ડીઆરઆઈના અધિકારીઓને મળેલી ચોક્કસ અને ગુપ્ત બાતમીના આધારે ન્હાવા શેવા બંદર પર આઠ શંકાસ્પદ કન્ટેનરને અટકાવવામાં આવ્યા હતા.

આ કન્ટેનરની સઘન તપાસ દરમિયાન અધિકારીઓ પણ ચોંકી ગયા હતા, જે માલ સામાન્ય ઈલેક્ટ્રોનિક આઈટમ તરીકે જાહેર કરવામાં આવ્યો હતો, તેની અંદરથી કરોડો રૂપિયાના પ્રતિબંધિત વોકી-ટોકી સેટ અને સેકન્ડ હેન્ડ હાર્ડ ડિસ્ક ડ્રાઈવ મળી આવ્યા હતા. જપ્ત કરાયેલા સામાનમાં 11,000 થી વધુ 'બાઓફેંગ BF-888S' મોડલના વોકી-ટોકી સેટનો સમાવેશ થાય છે, જેની બજાર કિંમત અંદાજે ₹2.25 કરોડ થાય છે. આ ઉપરાંત, 52,000 થી વધુ સેકન્ડ હેન્ડ હાર્ડ ડિસ્ક ડ્રાઈવ પણ જપ્ત કરવામાં આવી છે, જેની કિંમત ₹6.75 કરોડ આંકવામાં આવી છે. સમગ્ર કન્સાઇનમેન્ટમાં અન્ય ચીજવસ્તુઓ મળીને કુલ ₹30 કરોડનો મુદ્દામાલ ખોટી રીતે આયાત કરવામાં આવ્યો હતો.

તપાસમાં જાણવા મળ્યું છે કે જપ્ત કરાયેલા 'બાઓફેંગ' વોકી-ટોકી સેટ ભારત સરકારના દૂરસંચાર વિભાગ  દ્વારા બ્લેકલિસ્ટ કરવામાં આવ્યા છે. આ ઉપકરણો નિર્ધારિત ફ્રીક્વન્સી સિવાયની ફ્રીક્વન્સી પર કામ કરે છે, જેનો ઉપયોગ રાષ્ટ્રવિરોધી તત્વો અનધિકૃત અને ગુપ્ત સંદેશાવ્યવહાર માટે કરી શકે છે. આવા સાધનો માટે ખાસ સરકારી લાયસન્સ હોવું અનિવાર્ય છે, જે આ કિસ્સામાં લેવામાં આવ્યું નહોતું. વોકી-ટોકીની સાથે પકડાયેલી સેકન્ડ હેન્ડ હાર્ડ ડિસ્ક પણ પર્યાવરણ અને સુરક્ષા માટે જોખમી છે.

ડાયરેક્ટોરેટ જનરલ ઓફ ફોરેન ટ્રેડની પરવાનગી વિના જૂની હાર્ડ ડિસ્કની આયાત કરી શકાતી નથી, કારણ કે તેને 'ઈ-વેસ્ટ' તરીકે વર્ગીકૃત કરવામાં આવે છે. આયાતકારોએ જરૂરી મંજૂરીઓ મેળવવાને બદલે ખોટા લેબલ લગાવીને સરકારી નિયમોને બાયપાસ કરવાનો પ્રયાસ કર્યો હતો. આ ગંભીર આર્થિક અને સુરક્ષા અપરાધના કેસમાં મુંબઈ સ્થિત બે આયાત કંપનીઓના માલિકોની ધરપકડ કરવામાં આવી છે. પિતા અને પુત્રની આ જોડીએ ચીનથી આ ગેરકાયદે માલ મંગાવ્યો હોવાનું પ્રાથમિક તપાસમાં ખૂલ્યું છે.

કસ્ટમ એક્ટ હેઠળ તેમની વિરુદ્ધ ગુનો દાખલ કરવામાં આવ્યો છે અને હાલમાં તેઓ સુરક્ષા એજન્સીઓની કસ્ટડીમાં છે, ડીઆરઆઈ હવે આ સમગ્ર રેકેટના મૂળ સુધી પહોંચવા માટે વધુ તપાસ હાથ ધરી રહી છે. આ આયાત પાછળ કોઈ મોટું આંતરરાષ્ટ્રીય સિન્ડિકેટ કામ કરી રહ્યું છે કે કેમ અને આ વોકી-ટોકી સેટ્સનો સંભવિત ઉપયોગ ક્યાં થવાનો હતો, તે દિશામાં સુરક્ષા એજન્સીઓ ઝીણવટભરી તપાસ કરી રહી છે. આગામી દિવસોમાં આ કેસમાં વધુ કેટલાક મોટા ખુલાસા થવાની શક્યતા છે.