દુબઈના દરિયાકાંઠે પસાર થઈ રહેલા એક વિશાળ તેલ ટેન્કર પર ઈરાની ડ્રોન દ્વારા ભયાનક હુમલો કરવામાં આવ્યો છે. આ હુમલા બાદ જહાજમાં ભીષણ આગ લાગી હતી. આ ઘટનાના પગલે આંતરરાષ્ટ્રીય સ્તરે વ્યાપક સંઘર્ષ થવાની અને વૈશ્વિક ઉર્જા પુરવઠામાં મોટી અડચણ ઊભી થવાની આશંકાઓ અત્યંત પ્રબળ બની ગઈ છે.

2 મિલિયન બેરલ ક્રૂડ ભરેલા જહાજમાં આગ, 24 ક્રૂ સભ્યો સુરક્ષિત 

પ્રાપ્ત માહિતી અનુસાર, કુવૈતનો ધ્વજ ધરાવતા 'અલ-સાલ્મી' નામના વિશાળ ઓઈલ ટેન્કરને નિશાન બનાવવામાં આવ્યું હતું. હુમલા સમયે આ જહાજ 2 મિલિયન બેરલ જેટલું ક્રૂડ ઓઈલ વહન કરી રહ્યું હતું. ડ્રોન ટકરાતા જ ટેન્કરમાં આગ લાગી હતી. જોકે, દુબઈના સત્તાવાળાઓએ રાહતના સમાચાર આપતા જણાવ્યું છે કે જહાજમાં લાગેલી આગ પર સફળતાપૂર્વક કાબુ મેળવી લેવામાં આવ્યો છે. જહાજ પર ફરજ બજાવતા તમામ 24 ક્રૂ સભ્યોનો આબાદ બચાવ થયો છે અને તેઓ સંપૂર્ણપણે સુરક્ષિત છે.

દરિયામાં તેલ ઢોળાવાની અને પર્યાવરણીય નુકસાનની ભીતિ 

આગ પર કાબૂ મેળવાયો હોવા છતાં સંકટ હજુ ટળ્યું નથી. આ જહાજની માલિકી ધરાવતી કંપની 'કુવૈત પેટ્રોલિયમ કોર્પોરેશન' દ્વારા ગંભીર ચેતવણી ઉચ્ચારવામાં આવી છે. કંપનીના જણાવ્યા મુજબ, ડ્રોન હુમલાથી ટેન્કરના માળખાને જે નુકસાન પહોંચ્યું છે, તેના કારણે દરિયામાં મોટા પાયે તેલ છલકાઈ શકે છે, જે એક ભયાનક પર્યાવરણીય સંકટ નોતરી શકે છે.

અમેરિકા અને ઈઝરાયલ સાથેના વધતા તણાવનું પરિણામ 

આંતરરાષ્ટ્રીય નિષ્ણાતોના મતે, આ વર્ષની શરૂઆતમાં યુનાઇટેડ સ્ટેટ્સ અને ઇઝરાયલ દ્વારા ઈરાન પર કરવામાં આવેલા હુમલા બાદ આ વિસ્તારમાં તણાવ સતત વધી રહ્યો છે, જેની વચ્ચે આ ડ્રોન હુમલાની ઘટના સામે આવી છે. નોંધનીય છે કે, અગાઉ યુએસ પ્રમુખ ડોનાલ્ડ ટ્રમ્પે પણ કડક શબ્દોમાં ચેતવણી આપતા જણાવ્યું હતું કે, જો તેહરાન હોર્મુઝ સ્ટ્રેટ (સામુદ્રધુની) માં અવરોધ ઉભો કરવાનું ચાલુ રાખશે તો વોશિંગ્ટન "ઈરાનના ઉર્જા પ્લાન્ટ અને તેલ કુવાઓનો નાશ કરશે".

આ હુમલા બાદ મિડલ ઈસ્ટના દરિયાઈ વિસ્તારોમાં સુરક્ષા એજન્સીઓ એલર્ટ પર છે અને નુકસાનીનો તાગ મેળવવામાં આવી રહ્યો છે. આંતરરાષ્ટ્રીય સમુદાય આ ઘટના પર ચાંપતી નજર રાખી રહ્યો છે, કારણ કે તેની સીધી અસર આગામી દિવસોમાં વૈશ્વિક ક્રૂડ ઓઈલના માર્કેટ અને સપ્લાય ચેઈન પર જોવા મળી શકે છે.