બોલીવુડના ‘હી-મેન’ ધર્મેન્દ્ર હવે આપણી વચ્ચે નથી, પરંતુ તેમની યાદો અને તેમના કામ હજુ પણ હિન્દી સિનેમાના દરેક પ્રેમીના હૃદયમાં વસેલા છે. તેમના નિધન પછી પણ તેમને સન્માન આપવાનું ચાલુ છે.

બીજા દિવસે એક અવોર્ડ ફંક્શનમાં ધર્મેન્દ્રને લાઇફટાઇમ અચીવમેન્ટ અવોર્ડથી સન્માનિત કરવામાં આવ્યા. આ અવોર્ડ લેવા માટે મંચ પર તેમના પુત્ર બોબી દેઓલ પહોંચ્યા હતા.

એવોર્ડ લેતી વખતે ભાવુક થઈ ગયા બોબી
પિતાને મળતા સન્માનથી બોબીની આંખો તરત જ છલકાઈ ગઈ. તેઓ સ્પીચ દરમિયાન સિસકીઓ ભરીને રડી પડ્યા અને પોતાના લેજેન્ડરી પિતા ધર્મેન્દ્રનો આભાર માન્યો. બોબીએ કહ્યું,  “મને તમારી બધાની આંખોમાં મારા પાપા માટે પ્રેમ દેખાય છે. મારા પાપાએ તમને જાણ્યા વગર પણ તેમના કામ અને સોશિયલ મીડિયા રીલ્સ દ્વારા તમારા દિલને સ્પર્શ કર્યું છે. ઇન્સ્ટાગ્રામ પર રીલ્સ બનાવવું તેમનો નવો શોખ બની ગયો હતો.”

તેમણે આગળ કહ્યું, “તેઓ હંમેશા ઇચ્છતા હતા કે દરેક વ્યક્તિ ખુશ રહે. તેઓ માનતા હતા કે અમારા દરેકમાં કોઈને કોઈ ટેલન્ટ હોય છે અને જો આપણે તેના પર વિશ્વાસ કરીએ તો જીવનમાં કંઈ પણ હાંસલ કરી શકીએ. તેથી જ તેઓ આટલા વર્ષો સુધી આ ઇન્ડસ્ટ્રીમાં કામ કરતા રહ્યા. તેઓએ અહીં સારા-ખરાબ બધા દિવસો જોયા, પરંતુ ક્યારેય હાર ન માની.”

'હું જ્યાં પણ જાઉં છું, મને ઘણો પ્રેમ મળે છે'
બોબીએ તે તમામ લોકોનો આભાર માન્યો જેઓએ તેમના પિતા ધર્મેન્દ્ર અને આખા પરિવારને પ્રેમ આપ્યો. તેમણે કહ્યું, “હું જ્યાં પણ જાઉં છું, જેની સાથે મળું છું ત્યાં મને ઘણો પ્રેમ મળે છે. કારણ કે મારા પાપા અને ભાઈ માટે દરેકના હૃદયના તાળા ખુલ્લા છે. લોકો મારા પાપાને એટલો પ્રેમ કરે છે કે તેઓ વિચાર્યા વગર મને અને મારા ભાઈને પોતાનો સ્વીકારી લે છે. મને હજુ પણ લાગે છે કે હું ઘરે જઈને તેમને કહીશ કે મેં આ અવોર્ડ તેમના માટે જીત્યો છે. હું ખૂબ નસીબદાર છું અને ભગવાનનો આભારી છું કે તેમણે મને તેમનો પુત્ર બનાવ્યો. પાપા, તમે બેસ્ટ છો.”