લોકપ્રિય એડટેક પ્લેટફોર્મ ‘ફિઝિક્સવાલ્લાહ’ના સહ-સ્થાપક અને શિક્ષક અલખ પાંડેએ ફોર્બ્સની પ્રતિષ્ઠિત વર્લ્ડ બિલિયોનેર્સ લિસ્ટ 2026 માં સ્થાન મેળવીને મોટી સિદ્ધિ હાંસલ કરી છે. આ વર્ષે ફોર્બ્સની આ વૈશ્વિક યાદીમાં ભારતમાંથી કુલ 229 અબજોપતિઓએ પોતાનું સ્થાન જમાવ્યું છે, જેમાં મુકેશ અંબાણી અને ગૌતમ અદાણી દેશના સૌથી ધનિક ઉદ્યોગપતિઓ તરીકે ટોચ પર છે.

એન્જિનિયરિંગ ડ્રોપઆઉટથી લઈને અબજોપતિ સુધીની અલખ પાંડેની સફર 

ફોર્બ્સની યાદીમાં સ્થાન મેળવનાર 33 વર્ષીય અલખ પાંડેની સફર અત્યંત પ્રેરણાદાયક છે. એક સમયે એન્જિનિયરિંગ કોલેજમાંથી ડ્રોપઆઉટ થયેલા અલખે વર્ષ 2014 માં ઓનલાઈન ભૌતિકશાસ્ત્ર ભણાવવાની શરૂઆત કરી હતી. ત્યારબાદ, વર્ષ 2020 માં અલખ પાંડે અને પ્રતીક બૂબે સાથે મળીને એડટેક કંપની 'ફિઝિક્સવાલ્લાહ' ની સહ-સ્થાપના કરી હતી. આ પ્લેટફોર્મ દેશભરના લાખો વિદ્યાર્થીઓને વિવિધ સ્પર્ધાત્મક પરીક્ષાઓ પાસ કરવામાં મદદ કરવા માટે સસ્તા અને ગુણવત્તાયુક્ત અભ્યાસક્રમો પ્રદાન કરે છે.

મુકેશ અંબાણી, ગૌતમ અદાણી ટોચ પર, સાવિત્રી જિંદાલ સૌથી ધનિક મહિલા 

ફોર્બ્સ 2026 ની આ યાદીમાં 229 ભારતીય નાગરિકોનો સમાવેશ થાય છે. જેમાં રિલાયન્સ ઇન્ડસ્ટ્રીઝના મુકેશ અંબાણી ભારતના સૌથી ધનિક વ્યક્તિ અને અદાણી ગ્રુપના ગૌતમ અદાણી બીજા ક્રમના સૌથી ધનિક ભારતીય છે. ઓપી જિંદાલ ગ્રુપના માતૃશ્રી સાવિત્રી જિંદાલ 20 ભારતીય મહિલા અબજોપતિઓના સમૂહનું નેતૃત્વ કરી રહ્યા છે. તેઓ ત્રીજા ક્રમના સૌથી ધનિક ભારતીય હોવાની સાથે દેશના સૌથી ધનિક મહિલા તરીકેનો પોતાનો દરજ્જો પણ જાળવી રાખ્યો છે. ડોલર અને ટકાવારીની દ્રષ્ટિએ આ વર્ષે સંપત્તિમાં સૌથી વધુ ઉછાળો દેશના ચોથા ક્રમના સૌથી ધનિક વ્યક્તિ અને સ્ટીલ ઉદ્યોગપતિ લક્ષ્મી મિત્તલની સંપત્તિમાં નોંધાયો છે.

ઉદય કોટક અને પેટીએમના વિજય શેખર શર્માનું લિસ્ટમાં પુનરાગમન 

આ વર્ષે ભારતના ટોપ 10 અબજોપતિઓની યાદીમાં કેટલાક નોંધપાત્ર ફેરફારો જોવા મળ્યા છે. તાજેતરમાં પદ્મ ભૂષણથી સન્માનિત થયેલા કોટક મહિન્દ્રા બેંકના સ્થાપક અને અબજોપતિ બેંકર ઉદય કોટક ટોપ 10ની યાદીમાં નોંધપાત્ર સ્થાન ધરાવે છે. આ ઉપરાંત, જાણીતી પેમેન્ટ એપ પેટીએમના સ્થાપક વિજય શેખર શર્મા પણ આ વર્ષે અબજોપતિઓની આ વૈશ્વિક યાદીમાં ફરી એકવાર પાછા ફર્યા છે.