વર્તમાન સમયમાં પરંપરાગત ઈંધણના સ્ત્રોતો પર નિર્ભરતા ઘટાડવા અને સ્વચ્છ ઊર્જાને પ્રોત્સાહન આપવા માટે પાઈપ્ડ નેચરલ ગેસ (PNG) કનેક્શન એક આશીર્વાદ સમાન સાબિત થઈ રહ્યા છે. વડાપ્રધાન નરેન્દ્ર મોદીના વિઝન મુજબ, ગેસ કનેક્શન માત્ર રસોડાની સુવિધા નથી, પરંતુ તે આર્થિક બચત અને પર્યાવરણ સુરક્ષાનું માધ્યમ પણ છે. ખાસ કરીને યુદ્ધ જેવી વૈશ્વિક કટોકટીના સમયે, ઘરે-ઘરે PNG કનેક્શન હોવાથી સિલિન્ડરના સપ્લાય અને કાળાબજાર જેવી સમસ્યાઓથી મુક્તિ મળે છે, જે દિશામાં ગુજરાત સરકાર અત્યારે યુદ્ધના ધોરણે કામગીરી કરી રહી છે.

મુખ્યમંત્રી અને ગૃહ રાજ્યમંત્રીની અધ્યક્ષતામાં ઉચ્ચસ્તરીય સમીક્ષા બેઠક

ગાંધીનગરમાં મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવીએ વરિષ્ઠ સચિવો સાથે બેઠક યોજીને રાજ્યની સ્થિતિનો તાગ મેળવ્યો હતો. રાજ્યમાં ગેસ કનેક્શન આપવાની પ્રક્રિયા તેજ બનાવવામાં આવી છે. છેલ્લા 10 દિવસમાં જ 12,000 થી વધુ નવા PNG કનેક્શન આપવામાં આવ્યા છે, જેમાં શાળાઓ અને હોસ્પિટલોને પ્રાથમિકતા અપાઈ રહી છે.

મંત્રી હર્ષ સંઘવીએ સ્પષ્ટ આદેશ આપ્યો છે કે યુદ્ધની સ્થિતિનો લાભ લઈ પેટ્રોલ, ડીઝલ કે ગેસની સંગ્રહખોરી કરનારા તત્વો સામે કડક પોલીસ કાર્યવાહી કરી તેમને જેલભેગા કરવામાં આવે. રાજ્યમાં હાલમાં પેટ્રોલ, ડીઝલ, ગેસ અને ખાતર (Fertilizer) નો પૂરતો જથ્થો ઉપલબ્ધ છે. ઓઈલ અને ગેસ કંપનીઓ સાથે સતત સંકલન સાધીને ભવિષ્યમાં પણ સપ્લાય જળવાઈ રહે તેવું આયોજન કરાયું છે.

સપ્લાય ચેઈન પર નજર રાખવા માટે મુખ્ય સચિવના નેતૃત્વમાં સ્ટેટ લેવલ અને કલેક્ટરના નેતૃત્વમાં જિલ્લા સ્તરીય કોર્ડીનેશન કમિટીઓ કાર્યરત કરવામાં આવી છે. વિદેશમાં ફસાયેલા ગુજરાતીઓ (NRI) માટે સ્પેશિયલ હેલ્પલાઇન શરૂ કરવામાં આવી છે. આ ઉપરાંત, રાજ્યના શ્રમિકોને તેમનું મહેનતાણું સમયસર મળી રહે તે માટે શ્રમ વિભાગને સૂચનાઓ અપાઈ છે.

આમ, રાજ્ય સરકાર દ્વારા તમામ મોરચે સાવચેતીના પગલાં ભરીને સામાન્ય જનતાને મુશ્કેલી ન પડે તેની ખાતરી કરવામાં આવી છે.