રાજ્યના હવામાનમાં ફરી એકવાર અચાનક પલટો જોવા મળી રહ્યો છે. હવામાન વિભાગના ડાયરેક્ટર ડૉ. એ. કે. દાસના જણાવ્યા અનુસાર, સક્રિય થયેલા વેસ્ટર્ન ડિસ્ટર્બન્સના કારણે ગુજરાતના કેટલાક જિલ્લાઓમાં આગામી 24 કલાક દરમિયાન કમોસમી વરસાદ પડવાની સંભાવના છે. જોકે, આ વરસાદી માહોલ બાદ રાજ્યમાં આકરા ઉનાળાની ખરી શરૂઆત થશે અને ગરમીના પારામાં નોંધપાત્ર વધારો થશે.

સૌરાષ્ટ્ર અને ઉત્તર-મધ્ય ગુજરાતમાં માવઠાની શક્યતા 

હવામાન વિભાગની લેટેસ્ટ આગાહી મુજબ, આજે રાજ્યના કેટલાક વિસ્તારોમાં સામાન્ય વરસાદ વરસી શકે છે. ખાસ કરીને સાબરકાંઠા, અરવલ્લી, મહીસાગર અને દાહોદ જેવા ઉત્તર અને મધ્ય ગુજરાતના પટ્ટામાં તેમજ સૌરાષ્ટ્રના ગીર સોમનાથ, અમરેલી, ભાવનગર અને દીવમાં છૂટોછવાયો કે સામાન્ય વરસાદ પડવાની આગાહી કરવામાં આવી છે. ઉનાળાની શરૂઆતમાં જ કમોસમી વરસાદની આ આગાહીને પગલે રવિ પાક લેતા ખેડૂતોની ચિંતામાં વધારો થયો છે.

24 કલાક બાદ તાપમાનમાં 3 થી 5 ડિગ્રીનો ઉછાળો આવશે

ગરમીના પ્રકોપ અંગે વાત કરતા હવામાન વિભાગના ડાયરેક્ટર ડૉ. એ. કે. દાસે જણાવ્યું હતું કે, "વેસ્ટર્ન ડિસ્ટર્બન્સની અસર મહદઅંશે 24 કલાક પૂરતી જ રહેશે. આ સમયગાળો પૂર્ણ થયા બાદ રાજ્યમાં ધીમે ધીમે તાપમાનનો પારો ઊંચકાવવા લાગશે." હવામાન વિભાગે સ્પષ્ટ કર્યું છે કે 24 કલાક પછી મહત્તમ તાપમાનમાં 3 થી 5 ડિગ્રી જેટલો સીધો વધારો થઈ શકે છે. જેના કારણે આગામી દિવસોમાં લોકોએ ફરીથી કાળઝાળ ગરમીનો સામનો કરવો પડશે.

અમદાવાદમાં વાદળછાયું વાતાવરણ રહેશે 

અમદાવાદ શહેરના વાતાવરણ અંગે વાત કરીએ તો, અહીં કમોસમી વરસાદની કોઈ સીધી આગાહી નથી, પરંતુ વાતાવરણમાં ફેરફાર ચોક્કસ અનુભવાશે. આગામી સમય દરમિયાન અમદાવાદ શહેરમાં આકાશ મુખ્યત્વે વાદળછાયું રહેશે. વાદળછાયા વાતાવરણને કારણે સીધા તડકાથી થોડી રાહત મળી શકે છે, પરંતુ બફારા અને ઉકળાટનું પ્રમાણ વધી શકે છે.

અચાનક વરસાદ અને ત્યારબાદ તાપમાનમાં 3 થી 5 ડિગ્રીના ઉછાળાને કારણે લોકોને બેવડી ઋતુનો અનુભવ થશે. આ બદલાતા વાતાવરણમાં મિશ્ર ઋતુને કારણે વાયરલ ઇન્ફેક્શન અને રોગચાળો વકરવાની શક્યતા હોવાથી તબીબો દ્વારા લોકોને સ્વાસ્થ્ય પ્રત્યે વિશેષ કાળજી રાખવા અને હાઇડ્રેટેડ રહેવા સલાહ આપવામાં આવી રહી છે.

એ.કે. દાસ, હવામાન વિભાગ નિયામક, અમદાવાદ