હિન્દુ ધર્મમાં હનુમાન જન્મોત્સવનો પર્વ ખૂબ જ શ્રદ્ધા અને ઉત્સાહ સાથે ઉજવવામાં આવે છે. માન્યતા છે કે આ દિવસે ભગવાન શ્રીરામના પરમ ભક્ત હનુમાનજીનો જન્મ થયો હતો, તેથી ભક્તો આ અવસરે વ્રત રાખે છે અને વિધિ-વિધાન પૂર્વક પૂજા-અર્ચના કરે છે. વર્ષ 2026 માં હનુમાન જયંતી 2 એપ્રિલના રોજ ઉજવાશે. જ્યોતિષ શાસ્ત્ર અનુસાર, આ દિવસે પોતાની રાશિ મુજબ દાન કરવું અત્યંત ફળદાયી માનવામાં આવે છે. આમ કરવાથી હનુમાનજીની કૃપા પ્રાપ્ત થાય છે અને જીવનમાં આવતી મુશ્કેલીઓ ધીરે-ધીરે ઓછી થવા લાગે છે.

રાશિ મુજબ દાનના ઉપાયો

મેષ રાશિના જાતકો માટે દાડમ, ટામેટા અથવા ઘઉંનું દાન કરવું શુભ છે,

જ્યારે વૃષભ રાશિના લોકો દૂધ, દહીં કે ચોખાનું દાન કરી શકે છે.

મિથુન રાશિ માટે લીલા શાકભાજી અને મગનું દાન આત્મવિશ્વાસ વધારે છે, 

કર્ક રાશિના જાતકો ચોખા અને નાળિયેરનું દાન કરી આર્થિક સ્થિતિમાં સુધારો લાવી શકે છે.

સિંહ રાશિના લોકો ગોળ અને સફરજનનું દાન કરી સકારાત્મક ઉર્જા મેળવી શકે છે.

કન્યા રાશિ માટે લીલા ફળો અને શરબતનું દાન સ્વાસ્થ્ય માટે લાભદાયી છે.

તુલા રાશિના જાતકોએ સફેદ વસ્ત્ર કે સાકરનું દાન કરવું જોઈએ. 

વૃશ્ચિક રાશિ માટે લાલ ચંદન અને મસૂરની દાળનું દાન વિશેષ ફળદાયી રહેશે.

ધન રાશિના ભક્તો ચણાની દાળ અને પીળા વસ્ત્રોનું દાન કરી શકે છે.

મકર રાશિ માટે કાળા તલ કે ધાબળાનું દાન નકારાત્મકતા દૂર કરે છે.

કુંભ રાશિના લોકોએ છત્રી કે બેગનું દાન કરવું જોઈએ.

મીન રાશિના જાતકો માટે જરૂરિયાતમંદોને ખીચડી ખવડાવવી અત્યંત પુણ્યદાયક માનવામાં આવે છે.