ઝારખંડના હઝારીબાગ જિલ્લામાં એક હચમચાવી દેનારી અને હ્રદયદ્રાવક ઘટના સામે આવી છે. વિષ્ણુગઢ પોલીસ સ્ટેશન વિસ્તારમાં 11 વર્ષની એક માસૂમ બાળકીની નિર્મમ હત્યા કરવામાં આવી છે. પ્રાથમિક તપાસમાં શંકા સેવાઈ રહી છે કે બાળકી પર જાતીય હુમલો કર્યા બાદ પુરાવાનો નાશ કરવા માટે તેને પથ્થરથી કચડીને અને ગળું દબાવીને મોતને ઘાટ ઉતારી દેવાઈ છે. આ ઘૃણાસ્પદ ગુનાને પગલે સમગ્ર વિસ્તારમાં ભારે આક્રોશ અને ચકચાર મચી જવા પામી છે.

રામનવમીના સરઘસમાં ગઈ અને લાપતા બની 

પ્રાપ્ત વિગતો અનુસાર, મંગળવારે સાંજે ગામમાં રામનવમીના તહેવાર નિમિત્તે મંગળા સરઘસ કાઢવામાં આવ્યું હતું. આ 11 વર્ષની બાળકી પણ તે સરઘસ જોવા માટે ગઈ હતી. પરંતુ જ્યારે તે રાત્રે 8 વાગ્યા સુધી ઘરે પરત ન ફરી, ત્યારે ચિંતિત પરિવારજનોએ તેની શોધખોળ શરૂ કરી હતી. પરિવારે આખી રાત ગામ અને આસપાસના વિસ્તારોમાં ભારે શોધખોળ કરી હોવા છતાં માસૂમનો કોઈ પતો લાગ્યો નહોતો.

મહુડા વીણવા ગયેલા ગ્રામજનોએ વિકૃત મૃતદેહ જોયો 

બુધવારે સવારે જ્યારે ગ્રામજનો મહુડા એકઠા કરવા માટે ગામથી લગભગ 500 મીટર દૂર વાંસના ઝુંડ પાસે ગયા, ત્યારે તેઓએ ઝાડીઓ પાસે બાળકીનો વિકૃત મૃતદેહ જોયો હતો. બાળકીનું મોઢું એક ભારે પથ્થરથી ખરાબ રીતે કચડી નાખવામાં આવ્યું હતું. મૃતદેહની ભયાનક હાલત પરથી ગ્રામજનોએ શંકા વ્યક્ત કરી છે કે આ ઘાતકી હત્યા કરતા પહેલા તેની પર બળાત્કાર ગુજારવામાં આવ્યો હતો.

પોલીસની સઘન તપાસ: ડોગ સ્ક્વોડ અને ફોરેન્સિક ટીમની મદદ 

માહિતી મળતાની સાથે જ વિષ્ણુગઢ પોલીસ તાત્કાલિક ઘટનાસ્થળે પહોંચી હતી અને મૃતદેહનો કબજો મેળવી પોસ્ટમોર્ટમ માટે મોકલી આપ્યો હતો. ઘટનાની અત્યંત સંવેદનશીલતાને ધ્યાનમાં રાખીને, પોલીસે ઘટનાસ્થળેથી વૈજ્ઞાનિક પુરાવા એકત્ર કરવા માટે ડોગ સ્ક્વોડ અને ફોરેન્સિક ટીમને બોલાવી હતી. વિષ્ણુગઢ પોલીસ સ્ટેશનના પ્રભારી સપન કુમાર મહતોએ આ અંગે માહિતી આપતા જણાવ્યું હતું કે, પોલીસ તમામ પાસાઓથી કેસની ઝીણવટભરી તપાસ કરી રહી છે અને પૂછપરછ માટે કેટલાક શંકાસ્પદોની અટકાયત પણ કરવામાં આવી છે.

આ દર્દનાક ઘટનાથી ગામમાં ભારે શોક અને તણાવનો માહોલ છે. પરિજનોના આક્રંદથી વાતાવરણ ગમગીન છે. પોલીસે ગ્રામજનોને શાંતિ જાળવવા અપીલ કરી છે અને ખાતરી આપી છે કે ટૂંક સમયમાં આરોપીઓની ઓળખ કરીને કડક કાનૂની કાર્યવાહી કરવામાં આવશે. બાળકીનો પોસ્ટમોર્ટમ રિપોર્ટ આવ્યા બાદ જ ગુનાની ચોક્કસ હકીકતો અને દુષ્કર્મની પુષ્ટિ થઈ શકશે.