ગુજરાતમાં ઉનાળાની શરૂઆતમાં જ આકરી ગરમીનો અનુભવ કરી રહેલા નાગરિકો માટે હવામાન વિભાગે ચિંતાજનક સમાચાર આપ્યા છે. રાજ્યના હવામાનમાં આવેલા અચાનક પલટાને કારણે આગામી બે દિવસ દરમિયાન 11 જિલ્લાઓમાં કમોસમી વરસાદ એટલે કે માવઠાની આગાહી કરવામાં આવી છે. ભરઉનાળે વરસાદી માહોલ સર્જાતા જનજીવન પર તેની સીધી અસર જોવા મળી રહી છે. હવામાન વિભાગના જણાવ્યા અનુસાર, આજે અને આવતીકાલે ખાસ કરીને સૌરાષ્ટ્ર અને ઉત્તર ગુજરાતના વિવિધ ભાગોમાં વરસાદી ઝાપટાં પડી શકે છે. આ કમોસમી વરસાદ માત્ર હળવો જ નહીં, પરંતુ ગાજવીજ સાથે આવવાની શક્યતા છે.

આકાશમાં વાદળછાયા વાતાવરણને કારણે મહત્તમ તાપમાનમાં થોડો ઘટાડો નોંધાઈ શકે છે, પરંતુ ભેજનું પ્રમાણ વધતા બફારો વધવાની પણ શક્યતા છે.માવઠાની આગાહીની સાથે સાથે હવામાન વિભાગે તેજ પવન ફૂંકાવાની પણ ચેતવણી આપી છે. રાજ્યના અસરગ્રસ્ત વિસ્તારોમાં 30 થી 40 કિમી પ્રતિ કલાકની ઝડપે પવન ફૂંકાઈ શકે છે. આ તેજ પવનને કારણે કાચા મકાનો, પતરાં અને હોર્ડિંગ્સને નુકસાન થવાની ભીતિ સેવાઈ રહી છે, જેના પગલે તંત્ર દ્વારા સાવચેતી રાખવા સૂચના આપવામાં આવી છે. આ કમોસમી વરસાદની સૌથી વધુ નકારાત્મક અસર ખેતી ક્ષેત્રે જોવા મળી રહી છે. ભરઉનાળે માવઠાની શક્યતાના પગલે જગતના તાતની ચિંતામાં મોટો વધારો થયો છે.

ખેતરમાં ઉભેલા ઉનાળુ પાક જેવા કે બાજરી, મગફળી અને તલના પાકને ભારે નુકસાન થવાની ભીતિ છે, આ ઉપરાંત, બાગાયતી પાકોમાં કેરીના પાકને પણ પવન અને વરસાદથી મોટું નુકસાન થઈ શકે છે.ખેતીવાડી વિભાગ દ્વારા ખેડૂતોને અપીલ કરવામાં આવી છે કે તેઓ પોતાના તૈયાર પાકને સુરક્ષિત સ્થળે ખસેડી લે અથવા તેને યોગ્ય રીતે ઢાંકી દે. માર્કેટિંગ યાર્ડમાં રહેલા અનાજના જથ્થાને પણ નુકસાન ન થાય તે માટે યાર્ડના સત્તાધીશોને તાકીદ કરવામાં આવી છે. ખેડૂતોને પવન દરમિયાન ખેતરમાં જંતુનાશક દવાઓનો છંટકાવ ન કરવા પણ સલાહ અપાઈ છે.

ઉત્તર ગુજરાતના બનાસકાંઠા, સાબરકાંઠા અને પાટણ જેવા જિલ્લાઓ તેમજ સૌરાષ્ટ્રના અમરેલી અને ભાવનગર જેવા વિસ્તારોમાં વરસાદી માહોલ વધુ ઘેરો બની શકે છે. સ્થાનિક વહીવટી તંત્રને પણ એલર્ટ રહેવા જણાવાયું છે. ખાસ કરીને નીચાણવાળા વિસ્તારોમાં રહેતા લોકોને સાવધ રહેવા અને વૃક્ષો કે વીજળીના થાંભલા નીચે આશરો ન લેવા સૂચના અપાઈ છે. આમ, એક તરફ સુર્યદેવ પ્રકોપ વરસાવી રહ્યા છે ત્યારે બીજી તરફ કુદરતનો આ અણધાર્યો વળાંક રાજ્ય માટે આફત સમાન સાબિત થઈ રહ્યો છે.