પશ્ચિમ એશિયામાં યુદ્ધના વાદળો વધુ ઘેરા બની રહ્યા છે. યમનના ઈરાન સમર્થિત હુથી ચળવળે ઈઝરાયલ પર પોતાના 3 જા મિસાઈલ હુમલાની જવાબદારી સ્વીકારી છે. આ ઘટના ઈરાન-ઈઝરાયલ સંઘર્ષને વધુ વ્યાપક બનાવવાનો સંકેત આપે છે, જેનાથી પશ્ચિમ એશિયામાં યુદ્ધનો વધુ એક સક્રિય મોરચો ખુલવાની ગંભીર ચિંતાઓ ઊભી થઈ છે.

હુથી પ્રવક્તાની 'ત્રીજી લશ્કરી કાર્યવાહી'ની જાહેરાત 

હુથી લશ્કરી પ્રવક્તા બ્રિગેડિયર જનરલ યાહ્યા સાડીએ એક ટેલિવિઝન નિવેદન દ્વારા આ હુમલાની પુષ્ટિ કરી હતી. તેમણે જણાવ્યું હતું કે જૂથે પોતાની "ત્રીજી લશ્કરી કાર્યવાહી" હાથ ધરી છે, જેમાં બેલિસ્ટિક મિસાઇલો દ્વારા "સંવેદનશીલ ઇઝરાયલી દુશ્મન લક્ષ્યો" પર હુમલો કરવામાં આવ્યો છે. પ્રવક્તાએ સ્પષ્ટ ચેતવણી આપતા કહ્યું હતું કે, "આ હુમલો ઈરાન અને લેબનોનના હિઝબુલ્લાહ સાથેના સંકલનમાં કરવામાં આવ્યો છે અને જ્યાં સુધી તમામ પ્રતિકાર મોરચા પર આક્રમણ બંધ ન થાય ત્યાં સુધી અમારી કામગીરી ચાલુ રહેશે."

ઈઝરાયલની એર ડિફેન્સ સિસ્ટમે હુમલાને નિષ્ફળ બનાવ્યો 

આ મિસાઈલ હુમલા અંગે ઇઝરાયલી અધિકારીઓએ માહિતી આપતા જણાવ્યું હતું કે તેમની હવાઈ સંરક્ષણ પ્રણાલીઓએ આવનારા તમામ ખતરાઓને હવામાં જ અટકાવી દીધા હતા. હાલમાં કોઈ જાનહાનિ કે મોટા નુકસાનના તાત્કાલિક અહેવાલ મળ્યા નથી. જોકે, હુમલાની દહેશતને પગલે ઇલાત અને નેગેવ રણના ભાગો સહિત દક્ષિણ ઇઝરાયલના વિસ્તારોમાં હવાઈ હુમલાની ચેતવણી આપતા સાયરન વાગ્યા હોવાની પુષ્ટિ થઈ છે.

દરિયાઈ વેપાર અને પ્રાદેશિક સુરક્ષા સામે મોટો ખતરો

 માર્ચના અંતથી હુથીઓ દ્વારા સતત મિસાઇલ અને ડ્રોન લોન્ચ કરવામાં આવી રહ્યા છે. રાજધાની સના સહિત ઉત્તર યમનના મોટા ભાગ પર નિયંત્રણ ધરાવતું આ જૂથ અગાઉ પણ લાલ સમુદ્ર અને એડનના અખાતમાં શિપિંગ માર્ગોને નિશાન બનાવી ચૂક્યું છે. યમનના પશ્ચિમી દરિયાકાંઠા પર તેમનું નિયંત્રણ વ્યૂહાત્મક બાબ અલ મંડેબ સ્ટ્રેટના જળમાર્ગ માટે મોટો ખતરો છે. લેબનોનમાં ઈરાન અને હિઝબુલ્લાહ સાથેના ચાલી રહેલા તણાવ વચ્ચે આ ઘટનાક્રમ ઈઝરાયલ પર વધારાનું દબાણ ઊભું કરે છે.