આ વર્ષે ઉનાળો તેના અસલી મિજાજમાં દેખાઈ રહ્યો છે. ગરમીની હજુ તો શરૂઆત જ થઈ છે ત્યાં સૂર્યનારાયણ આકરા પાણીએ હોય તેમ લાગી રહ્યું છે. હવામાન વિભાગની આગાહી મુજબ, એપ્રિલથી જૂન દરમિયાન આકરી હીટવેવ આપણને પરેશાન કરી શકે છે. ખાસ કરીને બિલ્ડિંગના સૌથી ઉપરના માળે રહેતા પરિવારો માટે આ સમય કોઈ મોટી આફતથી ઓછો નથી હોતો, કારણ કે સીધો તડકો છત પર પડવાથી આખું ઘર 'બોઈલર' જેવું ધગધગવા લાગે છે. પરંતુ, ગભરાવાની જરૂર નથી! શું તમે જાણો છો કે એસીના તોતિંગ બિલ અને વધુ પડતા ઉપયોગ વગર પણ તમે તમારા ઘરને કુદરતી રીતે 4°C થી 5°C સુધી ઠંડું રાખી શકો છો?

કેટલીક સરળ અને સ્માર્ટ ટિપ્સ જેવી કે 'વ્હાઈટ કૂલ રૂફ પેન્ટ' અને 'ટેરેસ ગાર્ડનિંગ' દ્વારા તમે આકરી ગરમીમાં પણ ઠંડકનો અનુભવ કરી શકો છો. ચાલો જાણીએ, ગરમીનો પારો આસમાને પહોંચે તે પહેલાં કઈ રીતે કરી શકાય ઘરને 'કૂલ-કૂલ' રાખવાની પૂર્વ તૈયારીઓ. ગરમીની શરૂઆત સાથે જ તાપમાનનો પારો વધવા લાગ્યો છે, ત્યારે લોકો અત્યારથી જ ગરમીથી બચવાના ઉપાયો શોધી રહ્યા છે. ખાસ કરીને બિલ્ડિંગના સૌથી ઉપરના માળે રહેતા લોકો માટે આ ઋતુ પડકારજનક સાબિત થઈ રહી છે.

છત તપવાની સમસ્યા અને એસીની મર્યાદા

ઉપરના માળે સીધો તડકો છત પર પડવાથી દીવાલો અને ફ્લોર બોઈલરની જેમ ધગધગવા લાગે છે. આવી સ્થિતિમાં ઘરમાં લગાવેલા એસી પણ જોઈએ તેવી ઠંડક આપી શકતા નથી અને વીજળીનું બિલ પણ અનેકગણું વધી જાય છે. આ સમસ્યાના ઉકેલ માટે કેટલીક સ્માર્ટ અને કુદરતી રીતો અપનાવવી અનિવાર્ય બની ગઈ છે.

કૂલ રૂફ પેન્ટ: એક અસરકારક ઉપાય

છતને ઠંડી રાખવા માટે 'વ્હાઇટ કૂલ રૂફ પેન્ટ' અથવા 'હીટ રિફ્લેક્ટિવ પેન્ટ' સૌથી અસરકારક છે. જો બજેટ ઓછું હોય તો છત પર સાદો ચૂનો પણ લગાવી શકાય છે. સફેદ રંગ સૂર્યના કિરણોને રિફ્લેક્ટ કરે છે, જેનાથી ઘરના આંતરિક તાપમાનમાં 4°C થી 5°C સુધીનો મોટો ઘટાડો જોવા મળી શકે છે.

ટેરેસ ગાર્ડનિંગથી કુદરતી ઠંડક

છત પર નાનું ટેરેસ ગાર્ડન બનાવવું એ ગરમી સામે લડવાનો શ્રેષ્ઠ કુદરતી રસ્તો છે. કુંડા અને ક્યારીઓમાં રહેલી માટી અને છોડ સૂર્યની ગરમીને પોતાનામાં શોષી લે છે, જેના કારણે નીચેનો રૂમ ઠંડો રહે છે. આ ઉપરાંત, રાત્રે ઠંડક મેળવવા માટે સાંજે છત પર ઘાસની ચટાઈ બિછાવી તેના પર પાણીનો છંટકાવ કરવો ખૂબ જ ફાયદાકારક રહે છે.

વેન્ટિલેશનનું મહત્વ 

ઘરની અંદરની ગરમ હવાને બહાર કાઢવી ખૂબ જ જરૂરી છે. બપોરના સમયે રસોડા અને બાથરૂમના એક્ઝોસ્ટ ફેન ચલાવવાથી અંદર જમા થયેલી ગરમ હવા બહાર નીકળી જાય છે. રાત્રિના સમયે જ્યારે બહારનું તાપમાન થોડું ઓછું થાય ત્યારે બારીઓ ખુલ્લી રાખવી જોઈએ જેથી કુદરતી અને તાજી હવા અંદર આવી શકે અને રૂમ ઠંડો થાય.

પાણીનો છંટકાવ અને હાઈડ્રેશન

સાંજના સમયે છત પર નિયમિતપણે પાણીનો છંટકાવ કરવાથી પણ રૂમને ઠંડો રાખવામાં મોટી મદદ મળે છે. આ સાથે જ ઘરમાં ઈન્ડોર પ્લાન્ટ્સ રાખવાથી ભેજનું પ્રમાણ જળવાઈ રહે છે. ઘરને ઠંડું રાખવાની સાથે વ્યક્તિએ પોતે પણ પુષ્કળ પાણી પીવું જોઈએ જેથી હીટવેવની અસરથી બચી શકાય.

લાઈફસ્ટાઈલમાં ફેરફાર

ઉનાળા દરમિયાન બપોરના સમયે બારીઓ પર ઘાટા રંગના પડદા રાખવા જોઈએ જેથી સીધો તડકો અંદર ન પ્રવેશે. આ નાની પણ અત્યંત મહત્વની સાવચેતીઓ રાખીને તમે ભારે વીજળી ખર્ચ કર્યા વગર પણ તમારા ઘરને ઉનાળામાં ઠંડકભર્યું બનાવી શકો છો. સમયસરની તૈયારી તમને આકરી ગરમીમાં મોટી રાહત અપાવી શકે છે.