નાણાકીય વર્ષ 2025-26 માં દેશની સંરક્ષણ નિકાસ 62.66 ટકાના વધારા સાથે 38,424 કરોડ રૂપિયાના રેકોર્ડ સ્તરે પહોંચી ગઈ છે. આ આંકડાઓ ભારતીય સંરક્ષણ ઉત્પાદનોની વધતી વૈશ્વિક માંગ અને 'આત્મનિર્ભર ભારત' અભિયાનની એક મોટી સફળતા દર્શાવે છે.

14,802 કરોડ રૂપિયાનો જંગી ઉછાળો 

સંરક્ષણ મંત્રાલય દ્વારા જાહેર કરવામાં આવેલા સત્તાવાર આંકડા અનુસાર, પાછલા નાણાકીય વર્ષમાં દેશની સંરક્ષણ નિકાસ 23,622 કરોડ રૂપિયા હતી. જ્યારે નાણાકીય વર્ષ 2025-26 માં તેમાં 14,802 કરોડ રૂપિયાનો જંગી ઉછાળો નોંધાયો છે. આ 62.66% નો વધારો દર્શાવે છે, જે ભારતના સંરક્ષણ ઉદ્યોગ માટે એક ઐતિહાસિક અને ગૌરવપૂર્ણ ઉપલબ્ધિ છે.

જાહેર અને ખાનગી ક્ષેત્રનું શાનદાર પ્રદર્શન 

આ વિક્રમી સિદ્ધિ હાંસલ કરવામાં જાહેર અને ખાનગી એમ બંને ક્ષેત્રોએ નોંધપાત્ર યોગદાન આપ્યું છે. કુલ નિકાસમાં સંરક્ષણ જાહેર ક્ષેત્રના ઉપક્રમોનો હિસ્સો 54.84% અને ખાનગી ક્ષેત્રનો હિસ્સો 45.16% રહ્યો છે. આંકડાકીય રીતે જોઈએ તો, પાછલા વર્ષની સરખામણીમાં DPSUs ની નિકાસમાં 151% નો પ્રચંડ વધારો થયો છે. બીજી તરફ, ખાનગી કંપનીઓએ પણ પોતાની નિકાસમાં 14% નો વધારો નોંધાવીને વૈશ્વિક બજારમાં પોતાની મજબૂત હાજરી પ્રસ્થાપિત કરી છે.

ભારતીય હથિયારોની વૈશ્વિક સ્વીકૃતિ 

નિકાસમાં આવેલા આ તીવ્ર ઉછાળા અંગે સંરક્ષણ મંત્રાલયે સ્પષ્ટ કર્યું છે કે, આ આંકડાઓ ભારતીય નિર્મિત સંરક્ષણ ઉત્પાદનોની વધતી જતી વૈશ્વિક સ્વીકૃતિ દર્શાવે છે. આંતરરાષ્ટ્રીય સપ્લાય ચેઈન પણ ભારતનું સંકલન ઝડપથી વધી રહ્યું છે, જે દેશની ઉચ્ચ ગુણવત્તા અને તકનીકી ક્ષમતાનો પુરાવો છે.

'ભારત વૈશ્વિક ઉત્પાદન કેન્દ્ર બની રહ્યું છે' 

સંરક્ષણ મંત્રી રાજનાથ સિંહે આ શાનદાર પ્રદર્શનની પ્રશંસા કરતા ભારપૂર્વક જણાવ્યું હતું કે, ભારત હવે સંરક્ષણ સાધનો માટે વૈશ્વિક ઉત્પાદન કેન્દ્ર બનવા તરફ મક્કમતાથી આગળ વધી રહ્યું છે. તેમણે વધુમાં ઉમેર્યું હતું કે, વડા પ્રધાન નરેન્દ્ર મોદીના નેતૃત્વમાં, ભારત પ્રભાવશાળી સંરક્ષણ નિકાસ ક્ષેત્રે સફળતાની એક નવી ગાથા લખી રહ્યું છે.