પશ્ચિમ એશિયામાં ચાલી રહેલા તણાવ અને પેટ્રોલ-ડીઝલના ભાવ વધારાની અફવાઓ વચ્ચે કેન્દ્ર સરકારે દેશવાસીઓને મોટી રાહત આપી છે. સરકારે સ્પષ્ટ કર્યું છે કે ભારત પાસે 26 કરોડ ટન ક્રૂડ ઓઇલ રિફાઇન કરવાની ક્ષમતા છે, તેથી ઈંધણની કોઈ જ અછત નથી. સરકારે નાગરિકોને ગભરાટમાં આવીને ઈંધણની વધુ પડતી ખરીદી ન કરવા અને અફવાઓ પર બિલકુલ ધ્યાન ન આપવા અપીલ કરી છે.

નવી દિલ્હીમાં આંતર-મંત્રીસ્તરીય બ્રીફિંગ: ભાવ વધારાની વાત માત્ર અફવા 

ગઈકાલે નવી દિલ્હી ખાતે પશ્ચિમ એશિયાના તાજેતરના ઘટનાક્રમ અને દેશની ઈંધણ સ્થિતિ અંગે એક આંતર-મંત્રીસ્તરીય બ્રીફિંગનું આયોજન કરવામાં આવ્યું હતું. આ બ્રીફિંગને સંબોધતા પેટ્રોલિયમ અને કુદરતી ગેસ મંત્રાલયના સંયુક્ત સચિવ સુજાતા શર્માએ ઈંધણના પુરવઠા અંગે વિસ્તૃત માહિતી આપી હતી. તેમણે સ્પષ્ટતા કરી હતી કે દેશમાં પેટ્રોલ અને ડીઝલના ભાવમાં કોઈ જ વધારો કરવામાં આવ્યો નથી. બજારમાં વહેતી થયેલી ભાવ વધારાની વાતો માત્ર અફવા છે અને લોકોએ તેના પર વિશ્વાસ કરવો જોઈએ નહીં.

PNG કનેક્શન પ્રક્રિયા સરળ બનાવવા ગેઝેટ નોટિફિકેશન જારી 

દેશમાં પાઈપ્ડ નેચરલ ગેસના વિસ્તરણ અંગે વાત કરતા સંયુક્ત સચિવે જણાવ્યું હતું કે, સરકાર આ દિશામાં વિશેષ ધ્યાન કેન્દ્રિત કરી રહી છે. આ હેતુસર સરકાર દ્વારા એક નવું ગેઝેટ નોટિફિકેશન બહાર પાડવામાં આવ્યું છે. આ નોટિફિકેશનનો મુખ્ય ઉદ્દેશ્ય તમામ રાજ્યોમાં PNG કનેક્શન મેળવવા માટેની અરજી ફી અને મંજૂરી આપવાની સમયમર્યાદાને સુવ્યવસ્થિત અને એકસમાન બનાવવાનો છે, જેથી ગ્રાહકોને ઝડપથી ગેસ કનેક્શન મળી શકે.

માત્ર 25 દિવસમાં 2.5 લાખ નવા કનેક્શન, LPG થી PNG તરફ મોટો પ્રવાહ 

સરકારી પહેલની સકારાત્મક અસરોના આંકડા રજૂ કરતા સુજાતા શર્માએ ઉમેર્યું હતું કે, છેલ્લા આશરે 25 દિવસના ટૂંકા ગાળામાં જ દેશભરમાં લગભગ 2.5 લાખ નવા PNG કનેક્શન પૂરા પાડવામાં આવ્યા છે. આ ઉપરાંત, પાઈપલાઈન ગેસની સુવિધા વધતા લગભગ 2.2 લાખ જેટલા ગ્રાહકોએ LPG સિલિન્ડરનો ઉપયોગ બંધ કરીને PNG તરફ સફળતાપૂર્વક સ્થળાંતર કર્યું છે.