નમિત મલ્હોત્રા અને નિતેશ તિવારીની પૌરાણિક મહાકાવ્ય પર આધારિત ફિલ્મ 'રામાયણ' હાલમાં સમગ્ર વિશ્વમાં ચર્ચાનું કેન્દ્ર બની છે. આ ડ્રીમ પ્રોજેક્ટ માટે નિર્માતાઓએ અંદાજે 4,000 કરોડ રૂપિયાનું અધધ બજેટ ફાળવ્યું છે, જે ભારતીય સિનેમાના ઇતિહાસમાં અત્યાર સુધીનું સૌથી મોટું બજેટ છે. આ બે ભાગની ફિલ્મનું શૂટિંગ અને તેની ભવ્યતા જોઈને સિનેમાપ્રેમીઓ સ્તબ્ધ થઈ ગયા છે, અને તે વર્ષ 2026ની દિવાળી પર રિલીઝ થવા માટે તૈયાર છે. ફિલ્મના નિર્માણમાં માત્ર ભારતીય જ નહીં, પરંતુ વિદેશી ટેકનિકલ ટીમો પણ સામેલ છે.

ઓસ્કાર વિજેતા કાર્ય માટે જાણીતી વૈશ્વિક કંપની DNEG દ્વારા આ ફિલ્મના વિઝ્યુઅલ ઇફેક્ટ્સ તૈયાર કરવામાં આવ્યા છે. નિર્માતાઓએ ફિલ્મના ગ્રાફિક્સ અને સ્પેશિયલ ઇફેક્ટ્સ પાછળ પાણીની જેમ પૈસા ખર્ચ્યા છે, જેથી તેની સરખામણી 'ધ લોર્ડ ઓફ ધ રિંગ્સ' અને 'ગ્લેડીયેટર' જેવી વૈશ્વિક ફિલ્મો સાથે કરવામાં આવી રહી છે. ફિલ્મમાં રણબીર કપૂર ભગવાન રામનું મુખ્ય પાત્ર ભજવી રહ્યો છે, જેના માટે તેણે શારીરિક અને માનસિક રીતે સખત મહેનત કરી છે. તેની સાથે સાઈ પલ્લવી માતા સીતાના પાત્રમાં અને KGF ફેમ યશ રાવણ તરીકે જોવા મળશે.

આ ઉપરાંત સની દેઓલ, વિવેક ઓબેરોય, લારા દત્તા, કાજલ અગ્રવાલ અને અરુણ ગોવિલ જેવા દિગ્ગજ કલાકારો પણ મહત્વની ભૂમિકામાં જોવા મળશે, જે ફિલ્મને વધુ ભવ્ય બનાવે છે. 'રામાયણ'ના ફર્સ્ટ-લુક ટીઝરના રિલીઝ પછી સોશિયલ મીડિયા પર તેને પ્રશંસા અને ટીકા બંને મળી છે. કેટલાક લોકો તેની ભવ્યતાના વખાણ કરી રહ્યા છે, તો કેટલાક લોકો તેની સરખામણી જૂની રામાયણ સાથે કરી રહ્યા છે. જોકે, નિર્માતા નમિત મલ્હોત્રાએ સ્પષ્ટ કર્યું છે કે તેમનો અભિગમ અત્યંત મહત્વાકાંક્ષી છે અને તેમનો હેતુ ભારતીય સંસ્કૃતિને વિશ્વ સ્તરે શ્રેષ્ઠ ટેકનોલોજી સાથે રજૂ કરવાનો છે.

અત્યાર સુધી ભારતની સૌથી મોંઘી ફિલ્મોમાં '2.0', 'RRR', 'આદિપુરુષ' અને 'કલ્કી 2898 AD' જેવી ફિલ્મોના નામ મોખરે હતા, પરંતુ 4,000 કરોડના બજેટ સાથે 'રામાયણ' હવે આ તમામ રેકોર્ડ તોડીને પ્રથમ સ્થાને પહોંચી ગઈ છે. આટલા મોટા રોકાણ અને વૈશ્વિક ટેકનોલોજીના ઉપયોગને કારણે આ ફિલ્મ પ્રેક્ષકોને એક એવો વિઝ્યુઅલ અનુભવ પ્રદાન કરે તેવી અપેક્ષા છે જે અગાઉ ક્યારેય ભારતીય પડદા પર જોવા મળ્યો નથી.