જ્યારે સમાજમાં કાયદો અને વ્યવસ્થાનો ડર ઓગળવા લાગે છે, ત્યારે અસામાજિક તત્વો બેફામ બનીને માનવીય ગરિમાને ઠેસ પહોંચાડે છે. કોઈ વ્યક્તિની ઓળખ કે શંકાના આધારે તેને રસ્તા વચ્ચે આંતરીને અમાનવીય યાતનાઓ આપવી એ સભ્ય સમાજ માટે કલંક સમાન છે. આવી ઘટનાઓ માત્ર પીડિતના શરીર પર જ નહીં, પરંતુ તેના આત્મા પર પણ ક્યારેય ન ભુલાય તેવા જખમ છોડી જાય છે. ટોળાશાહી દ્વારા કરવામાં આવતું આવું કૃત્ય સામાજિક પતનની ચરમસીમા દર્શાવે છે.

છોટાઉદેપુર અને પંચમહાલ જિલ્લાની સરહદ પર એક કિન્નર સાથે થયેલી અમાનવીયતાની ઘટનાએ સમગ્ર પંથકને હચમચાવી દીધો છે. સુપ્રસિદ્ધ યાત્રાધામ ઝંડ હનુમાનના દર્શન કરીને પરત ફરી રહેલા કુનાલભાઈ દરજી નામના કિન્નરને રસ્તામાં રોકી 15થી વધુ શખ્સોના ટોળાએ બર્બરતા આચરી હોવાની વિગતો બહાર આવી છે.

ક્રૂરતાની પરાકાષ્ઠા અને લૂંટ

પીડિત કિન્નરના જણાવ્યા અનુસાર, હુમલાખોરોએ તેમને રસ્તામાં આંતરીને પ્રથમ ગાળો ભાંડી હતી અને ત્યારબાદ તેમને નિર્વસ્ત્ર કરી લાકડીઓ તથા દંડા વડે બેરહેમીથી ફટકાર્યા હતા. આટલેથી જ ન અટકતા, હુમલાખોરોએ તેમની પાસેથી રોકડ રકમની લૂંટ ચલાવી હતી અને સૃષ્ટિ વિરુદ્ધનું કૃત્ય કરવાનો પણ જઘન્ય પ્રયાસ કર્યો હતો. સોશિયલ મીડિયામાં વાયરલ થયેલા આ ઘટનાના વીડિયોમાં હુમલાખોરો પોલીસનો કોઈ ડર ન હોવાની બંગાઓ ફૂંકતા નજરે પડે છે.

શંકાના આધારે કાયદો હાથમાં લીધો

પ્રાથમિક વિગતો મુજબ, હુમલાખોરોને એવી શંકા હતી કે આ કિન્નર 'નકલી' છે અને લોકો પાસેથી ખોટી રીતે પૈસા પડાવે છે. જોકે, આ શંકાના આધારે કાયદો હાથમાં લઈને કોઈ વ્યક્તિને જાહેરમાં નગ્ન કરી માર મારવો એ ગંભીર ગુનો છે. આ ઘટનાને પગલે સ્થાનિક લોકોમાં ભારે રોષ જોવા મળી રહ્યો છે અને નરાધમોની ધરપકડની માંગ ઉઠી રહી છે.

બોર્ડર વિવાદને કારણે પોલીસ કાર્યવાહીમાં મૂંઝવણ

આ ઘટના પંચમહાલ અને છોટાઉદેપુર જિલ્લાની સરહદ પર બની હોવાથી શરૂઆતમાં કયા પોલીસ સ્ટેશનમાં ફરિયાદ નોંધાવવી તેને લઈને પીડિત મુશ્કેલીમાં મુકાયા હતા. જોકે, ઘટનાની ગંભીરતા જોતા ઉચ્ચ પોલીસ અધિકારીઓ આ મામલે તપાસ હાથ ધરીને વીડિયોમાં દેખાતા તમામ શખ્સોને કાયદાના શરણે લાવે તેવી પ્રબળ લોકમાંગ ઉઠી છે.