પશ્ચિમ એશિયામાં ચાલી રહેલા સંઘર્ષ અને વધતી અસ્થિરતા વચ્ચે ઈરાને યુનાઇટેડ સ્ટેટ્સ દ્વારા ઔપચારિક રીતે રજૂ કરાયેલા 48 કલાકના યુદ્ધવિરામના પ્રસ્તાવને સત્તાવાર રીતે ફગાવી દીધો છે. 

ત્રીજા દેશ મારફતે આવેલી ઓફર નકારી, જમીની કામગીરી તેજ કરી 

અહેવાલો અનુસાર, અમેરિકાએ એક ત્રીજા દેશના માધ્યમથી ઈરાનને 48 કલાક માટે યુદ્ધવિરામ લાગુ કરવાનો પ્રસ્તાવ મોકલ્યો હતો. જોકે, ઈરાને આ શાંતિ પ્રસ્તાવને ઠુકરાવી દીધો છે. એટલું જ નહીં, તેહરાને યુદ્ધ રોકવાને બદલે જમીન પર પોતાની લશ્કરી કામગીરી વધુ તીવ્ર બનાવીને આક્રમક પ્રતિક્રિયા આપી છે. બીજી તરફ, ઈરાન દ્વારા કરવામાં આવેલા આ અસ્વીકાર અંગે યુનાઇટેડ સ્ટેટ્સ તરફથી હજુ સુધી કોઈ સત્તાવાર કે જાહેર ટિપ્પણી કરવામાં આવી નથી.

અમેરિકા અને ઈઝરાયેલના ઈરાનની અંદર તાજા હુમલા 

યુદ્ધવિરામનો પ્રસ્તાવ ફગાવી દેવાયા બાદ યુએસ અને ઇઝરાયલી દળોએ ઈરાન પર દબાણ વધારવા માટે તેના આંતરિક વિસ્તારોમાં તાજા હુમલાઓ શરૂ કરી દીધા છે. ઈરાની અધિકારીઓએ માહિતી આપી છે કે આ સંયુક્ત હુમલાઓને કારણે દેશની મુખ્ય માળખાગત સુવિધાઓ (ઇન્ફ્રાસ્ટ્રક્ચર) નજીક વધારાની જાનહાનિ અને નુકસાન નોંધાયું છે.

ઈરાની સેનાનો વળતો પ્રહાર: F-15 અને A-10 વિમાનો પર હુમલાનો દાવો 

સામા પક્ષે ઈરાનની સેનાએ પણ આક્રમક વલણ અપનાવતા છેલ્લા કેટલાક કલાકોમાં નવી લશ્કરી સફળતાઓ મેળવી હોવાનો દાવો કર્યો છે. ઈરાની સૈન્યના જણાવ્યા અનુસાર, તેમણે દુશ્મન દળોના F-15 ફાઇટર એરક્રાફ્ટ અને A-10 થંડરબોલ્ટ ક્લોઝ ગ્રાઉન્ડ સપોર્ટ એરક્રાફ્ટ પર હુમલા કર્યા છે. આ સાથે જ ઈરાને સ્પષ્ટ પ્રતિજ્ઞા લીધી છે કે જ્યાં સુધી તેમની તમામ શરતો પૂર્ણ નહીં થાય ત્યાં સુધી આ લશ્કરી કામગીરી સતત ચાલુ રાખવામાં આવશે.